لە دانیشتنی ئەمڕۆی پەرلەمانی کوردستاندا، کە بە ئامادەبوونی 52 پەرلەمانتار لە فراکسیۆن و پێکهاتە جیاوازەکان و لەژێر بایکۆتی فەرمیی چەند لایەنێکی سیاسیدا بەڕێوەچوو، دەستەی نوێی سەرۆکایەتیی پەرلەمان هەڵبژێردرا.
ئاوێنە: بەگوێرەی ئەنجامی دەنگدانەکە، هەریەکە لە د. ڤالا فەرید لە فراکسیۆنی پارتی دیموکراتی کوردستان وەک سەرۆکی پەرلەمان، رامین نوری عەودیش لە پێکهاتەی مەسیحی وەک جێگری سەرۆکی پەرلەمان، و مونا نەبی قەهوەچی وەک سکرتێری پەرلەمانی کوردستان دیاریکران. هەرسێ بەربژێرەکە توانییان کۆی دەنگی سەرجەم ئەو 52 پەرلەمانتارە بەدەستبهێنن کە لە هۆڵی کۆبوونەوەکەدا ئامادەبوون.
دوابەدوای تەواوبوونی پرۆسەی دەنگدان و چوونە سەر سەکۆی سەرۆکایەتی، د. ڤالا فەرید، سەرۆکی هەڵبژێردراوی پەرلەمانی کوردستان لە وتەیەکدا سوپاسی ئەو پەرلەمانتارانەی کرد کە متمانەیان پێبەخشیون و بەڵێنی دا وەک دەستەی سەرۆکایەتی بە شێوەیەکی بێلایەنانە کارەکانیان ئەنجام بدەن.
هاوکات سەرۆکی نوێی پەرلەمان پەیامێکی ئاراستەی فراکسیۆنەکانی دیکە کرد و داوای لێکردن بگەڕێنەوە بۆ دانیشتنەکانی پەرلەمان، بە مەبەستی ناردنی ناوی ئەندامەکانیان بۆ پێکهێنانی لیژنەی یاسایی و دواتریش هەڵبژاردنی سەرجەم لیژنە هەمیشەییەکانی دیکەی پەرلەمان.
نەخشەی بەشداربووان و بایکۆتکاران لە دانیشتنەکەدا
ئەنجامدانی کۆبوونەوەکەی ئەمڕۆ لەسەر بنەمای بانگهێشتێکی فراکسیۆنی پارتی دیموکراتی کوردستان بوو بە ئامانجی کاراکردنەوەی پەرلەمان بە بەشداریی لایەنەکانی دیکە. ئەم هەنگاوە لە کاتێکدا بوو کە هەریەکە لە یەکێتیی نیشتمانیی کوردستان، یەکگرتووی ئیسلامی، کۆمەڵی دادگەری و رەوتی هەڵوێست بە فەرمی رەتیانکردەوە بەشداری لە دانیشتنەکەدا بکەن.
سەرەڕای هەڵوێستی فەرمیی ئەو لایەنانە بۆ بایکۆتکردن، بەڵام بەپێی ئامارەکانی ناو هۆڵی کۆبوونەوەکە، کۆی گشتیی ئامادەبووان گەیشتە 52 پەرلەمانتار کە بەم شێوەیە دابەش ببوون:
فراکسیۆنی پارتی دیموکراتی کوردستان: 39 پەرلەمانتار
پێکهاتەکان: 3 پەرلەمانتار
فراکسیۆنی یەکێتیی نیشتمانیی کوردستان: 3 پەرلەمانتار
جوڵانەوەی نەوەی نوێ: 3 پەرلەمانتار
رەوتی هەڵوێست: 2 پەرلەمانتار
پارتی سۆشیال دیموکراتی کوردستان: 1 پەرلەمانتار
بەرەی گەل: 1 پەرلەمانتار