لە بەرەبەیانی ئەمڕۆوە، هێزەکانی سوپای پاسدارانی ئێران دەستیان بە بۆردوومان و تۆپبارانکردنی چڕی چەند ناوچەیەکی سنووری شارۆچکەی مەریوان لە ڕۆژهەڵاتی کوردستان کردووە و بەهۆیەوە زیانێکی زۆر بەر ژینگەی ناوچەکە کەوتووە.
ئاوێنە: بەگوێرەی زانیاریی سەرچاوە خۆجێییەکان، هێرشەکان لە کاتژمێر ٧:٠٠ی بەیانییەوە دەستیان پێکردووە. لەو هێرشانەدا سوپای پاسداران لە ڕێگەی فڕۆکەی بێفڕۆکەوان (درۆنی خۆکوژ) و هاوەنەوە، بە چڕی گوندەکانی قامیشەڵە، هەنارەشێخان و گاگڵی لە سنووری مەریوان کردووەتە ئامانج.
ئەو سەرچاوانە ئاماژەیان بەوەش کردووە کە بۆردوومان و تۆپبارانەکە تا ئێستاش بەردەوامیی هەیە، و لە ئەنجامدا زیانێکی زۆری ماددی بەر ڕەز و باخی هاووڵاتییان و سرووشتی گوندەکانی ئەو سنوورە گەیشتووە.
ئەم هێرشانە لە کاتێکدایە کە لە ماوەی ڕابردووشدا، هێزەکانی ئێران بە شێوەیەکی بەردەوام ناوچە سنوورییەکانی مەریوان و بەرزاییەکانی چیای شاهۆ و داڵاهۆیان تۆپباران کردووە، ئەم دۆخەش بووەتە هۆی دروستبوونی ترس و دڵەڕاوکێ لەنێو دانیشتووانی ئەو ناوچانەدا.