مه‌سرور بارزانی، سه‌رۆكی حكومه‌تی هه‌رێم رایگه‌یاند، به ته‌له‌فۆن له‌گه‌ڵ تۆم باراك، نێرده‌ی سه‌رۆكی ئه‌مریكا بۆ كاروباری عێراق قسه‌ی كردوه‌و هه‌ردوكیان هاوڕابون له‌سه‌ر ئه‌وه‌ی كه ده‌بێت حكومه‌تی هه‌رێم "به به‌هێزی و یه‌كگرتویی" بمێنێته‌وه.
ئاوێنه: مه‌سرور بارزانی، سه‌رۆكی حكومه‌تی هه‌رێم، له په‌یامێكی له سه‌كۆی ئێكس وتویه‌تی، خۆشحاڵ بوم کە دوای سەردانەکەم بۆ بەغدا، لەگەڵ تۆم باراک، نێرده‌ی سه‌رۆكی ئه‌مریكا بۆ كاروباری عێراق به ته‌له‌فۆن قسەم کرد.
وتوشیه‌تی، هه‌ردوكمان هاوڕا بوین لەسەر ئەوەی کە دەبێت حکومەتی هەرێمی کوردستان بە بەهێزی و یەکگرتویی بمێنێتەوەو دەشبێت ناکۆکییەکانمان لەگەڵ حکومەتی فیدراڵیدا بەپێی دەستوری عێراق چارەسەر بکرێن.
مه‌سرور بارزانی هێمای بۆ ئه‌وه‌ش كردوه، له‌م چوارچێوه‌یه‌دا هەردولامان پێشوازیمان لە به‌ره‌وپێشچونه‌كانی ئەمڕۆ لەگەڵ سەرۆک وەزیران عەلی زەیدی و تیمه‌كه‌ی کرد لەسەر یاسای بودجەی فیدراڵی و بەپەرۆشەوە چاوەڕێی کۆتاییهێنانین بە ڕێککەوتنێک لەسەر دۆسیه‌ی نەوت و غاز.
سه‌رۆكی حكومه‌تی هه‌رێم وتوشیه‌تی، لە پەیوەندییە تەلەفۆنییەکەدا، جەختمان کردەوە لەسەر شه‌راكه‌تی بەهێزی نێوان هەرێمی کوردستان و ویلایەتە یەکگرتوەکانی ئەمریکا.