ئابووریناسێکی عێراقی لە شیکارییەکی نوێدا تیشک دەخاتە سەر شێوازی فرۆشتن و گواستنەوەی نەوتی بەشێک لە کێڵگەکانی هەرێمی کوردستان لە دەرەوەی دەسەڵاتی کۆمپانیای بەبازاڕکردنی نەوتی عێراق (سۆمۆ) و ئاماژە بەوە دەکات کە ڕۆژانە دەیان هەزار بەرمیل نەوت لە ڕێگەی تانکەر و کۆنتێنەری تایبەتەوە ڕەوانەی دەرەوە دەکرێن.
ئاوێنە: نەبیل مەرسومی، شارەزای بواری ئابووری، لە نووسینێکدا لەژێر ناونیشانی "پەیوەندیی کۆمپانیای دی ئێن ئۆ (DNO)ـی نەرویجی بە بەقاچاخبردنی نەوتی کوردستانەوە چییە؟"، زانیاری لەبارەی بەرهەمهێنان و فرۆشتنی نەوتی هەردوو کێڵگەی تاوکێ و فیشخابوور خستووەتە ڕوو.
بەپێی وتەی ئەو شارەزا ئابوورییە، کۆمپانیای (DNO)ـی نەرویجی کە کارپێکەری سەرەکیی هەردوو کێڵگەی نەوتیی تاوکێ و فیشخابوورە، ئاستی بەرهەمهێنانی ڕۆژانەی لەو دوو کێڵگەیەدا دەگاتە نزیکەی 73 هەزار بەرمیل. لەو بڕەش پشکی کۆمپانیا نەرویجییەکە 68%ـە.
مەرسومی ڕوونیکردووەتەوە، کۆمپانیای ناوبراو نەچووەتە پاڵ ئەو هەشت کۆمپانیا بیانییەی کە لە ساڵی 2025ـدا ڕێککەوتنیان لەگەڵ حکومەتی عێراق واژۆ کرد بە مەبەستی ڕادەستکردنی بەرهەمی نەوتەکەیان بە کۆمپانیای سۆمۆ. هەر بەهۆی ئەم پابەندنەبوونەشەوە، کۆمپانیاکە پشکی خۆی لە بەرهەمی نەوت لە دەرەوەی دەسەڵات و چاودێریی سۆمۆ، ڕاستەوخۆ بە کڕیارە ناوخۆییەکان دەفرۆشێت.
لە بەشێکی دیکەی نووسینەکەیدا، ئەو ئابووریناسە باس لە سەرچاوە و ڕێڕەوەکانی گواستنەوەی نافەرمیی نەوت دەکات و دەڵێت: "نەوتی هەردوو کێڵگەی تاوکێ و فیشخابوور، هاوشان لەگەڵ نەوتی کێڵگەی خورمەڵە لە سنووری پارێزگای کەرکووک، بە سەرچاوەی سەرەکیی ئەو نەوتە دادەنرێن کە لە ڕێگەی تانکەرەوە بە قاچاخ دەبرێنە دەرەوە."
سەبارەت بە ئاراستەی گواستنەوەی نەوتەکە، نەبیل مەرسومی ئاماژەی بە دوو ڕێڕەوی جیاواز کردووە کە پرۆسەکەی تێدا ئەنجام دەدرێت:
ڕێڕەوی یەکەم: گواستنەوەی نەوت بەرەو وڵاتی تورکیا لە ڕێگەی دەروازەی سنووریی ئیبراهیم خەلیلەوە.
ڕێڕەوی دووەم: گواستنەوەی نەوت بەرەو وڵاتی ئەفغانستان بە نێو خاکی ئێراندا، کە لە ڕێگەی هەردوو دەروازەی سنووریی باشماخ و پەروێزخانەوە لە سنووری پارێزگای سلێمانی ئەنجام دەدرێت.
لە کۆتایی شیکارییەکەیدا، مەرسومی وردەکاریی شێوازی شاردنەوەی نەوتەکە لە ڕێڕەوی دووەمدا دەخاتە ڕوو و باس لەوە دەکات کە سەرەتا نەوتەکە لە کۆگا گەورەکانی دەروازەی باشماخ عەمبار دەکرێت، دواتر بە مەبەستی شاردنەوە و پەردەپۆشکردنی پرۆسەی بەقاچاخبردنەکە، لە ڕێگەی تانکەر و لە ناو کۆنتێنەری گواستنەوەی تایبەتدا ڕەوانەی دەرەوەی سنوورەکان دەکرێت.