بەلاڤبوونا ڤایروسێ كۆرۆنا ل پرانیا وەلاتێن جیهانی بویە مەترسیەكا مەزن و هەرێما كوردستانێ ژی هەمی ئامادەباشی كرینە بۆ رێگری كرن ڤی ڤایروسی تایبەت ل خالێن سنوری، بەرپرسێن تەندروستیا قەزا زاخۆ دیار دكەن، هەر كەسەكێ ژ وەلاتێ چینێ ب رێیا دەروازێ نیڤ دەولەتی ئیبراهیم خەلیل بهیـَتە دناڤ هەرێما كوردستانێ دا دێ پشكنین بۆ هێنەكرن.
ئاوێنە، وارهێل نێروەی: د.قەرەنی سەعید عەبدولا، رێڤەبەرێ ساخلەمیا زاخۆ بۆ " ئاوێنە" راگەهاند: دا هەمی ئامادە باشی بهێنە كرن بۆ هەر حالەتەكێ ڤێ ڤایروسا كوژەك بەری چەند رۆژا مە سەرەدانا بنگەهێ ساخلەمیا دەروازێ نیڤ دەولەتی ئیبراهیم خەلیل كر دا هەمی كارێن پێدڤی بهێنە كرن، هەر كەسەكێ ل وەلاتێ چینێ برێیا دەروازێ ناڤبری بهێتە دناڤا كوردستانێ دا پشكنین بۆ بهێتە كرن.
ناڤهاتی گوت ژی: هەر كەسەكێ نیشانێن ڤێ نەخوشیێ ل دەف پەیداببن دێ هێتە رەوانەكرن بۆ نەخوشخانا زاخۆ یا شگتی و دێ بۆ دەمێ 14 رۆژا دناڤا ژوورەكا تایبەتدا چاڤدێریا وی كەسی هێتە كرن، پاشان دێ هێتە رەوانەكرن بۆ بەغدا دا ل وێرێ پێرابوونێن پێدڤی بۆ چارەسەریێ بۆ بهێنەكرن.
ئاشكرا ژی كر: ساخلەمیا زاخۆ هەماهەنگی دگەل ئاسایشا دەروازێ ناڤبری هەیە، نها تیمێن ساخلەمیێ بۆ دەمێ 24 دئامادە باشیێ دانە دا بشێن رێگریێ ل هاتنا ڤی جورێ ڤایروسی كۆرونا بكەن نەهێتە دناڤ هەرێمێ دا.