شانەی ڕاگەیاندنی ئەمنیی عێراق دەستگیرکردنی سەرکردەیەکی داعشی ڕاگەیاند کە گەورەترین داواکراوە لە هەرێمی کوردستان و چەندین پلانی تەقینەوە و کاری تیرۆریستی لە هەرێمی کوردستان داناوە.
ئاوێنه: شانەکە لە ڕاگەیەنراوێکدا ئەمڕۆ ڕایگەیاند، "لەسەر ڕاسپاردەی فەرماندەی هێزە چەکدارەکان و چاودێری و سەرپەرشتی وەزیری ناوخۆ و بریکاری وەزیری ناوخۆ توانیان "ئەبو ئیبراهیم دابق" یەکێک لە فەرماندە باڵاکانی داعش دەستگیربکەن.
ئاماژەی بەوەشکردووە، "ناوبراو یەکەم داواکراو بووە لە هەرێمی کوردستان و سەرپەرشتی چەندین پیلانی تەقینەوە و تیرۆرکردنی لە هەرێمی کوردستان و ناوچە سنورییەکان کردووە."
ئەوەشی خستووەتەڕوو، "پرۆسەی دەستگیرکردنەکە دوای زیاتر لە مانگ و نیوێک لە هەوڵی مەیدانی و بەدواداچوون لە پارێزگاکانی کەرکوک، نەینەوا، بەغدا و ئەنبار ئەنجامدراوە."
بەگوێرەی ڕاگەیەنراوەکە، ئەبو ئیبراهیم هاوسەری یەکێکە لەو ئافرەتە داعشانەی کە لەماوەی ڕابردوودا دەستگیرکراوە و چەکی بێدەنگ و تەقەمەنی بردووەتە پارێزگای هەولێر و هەروەها هاوکاربووە لە پارەدارکردنی گروپە تیرۆرستییەکان.
