د.سامان بەرزنجی وەزیری تەندروستی جەخت لەوە دەكاتەوە، توشبوون بە ڤایرۆسی كۆرۆنا لە هەرێم كەم بوەتەوە و تاوەكو ئێستاش هیچ توشبوویەكی نەوەی ئۆمیكرۆن لە هەرێم تۆمارنەكراوە.
ئاوێنه: د. سامان بەرزنجی بە ماڵپەڕی فەرمی یەكێتی وتووە، ژمارەی توشبوون بە ڤایرۆسی كۆرۆنا لە هەرێم كەم بوەتەوە، بەڵام بڵاوبونەوەی ڤایرۆسەكە هەر بەردەوامە و بەردەوامیش چاودێری بارودۆخەكە دەكەن.
وتوشیەتی، هەرچەندە ئۆمیكرۆن لە زیاتر لە 80 وڵاتی جیهاندا بڵاوبوەتەوە، بەڵام تاوەكو ئێستا هیچ توشبویەكی ئەو ڤایرۆسە لە هەرێم تۆمارنەكراوە، ئەو هاووڵاتیانەشی لەو وڵاتانەوە دەگەڕێنەوە كە توشبووی ئۆمیكرۆنی تێدایە، ئەگەر بێت و نیشانەكانی تێدا دەركەوتبێت وەك گومانلێكراو مامەڵەی لەگەڵدا دەكەن.
وەزیری تەندروستی جەختی لەوەش كردووەتەوە، رێكارەكان وەك هەمان رێكارەكانی پێشووە و ئەویش بە دوركەوتنەوە لە خەڵك و سەردانی كۆمەڵایەتی و دانانی ماسك و وەرگرتنی ڤاكسین.