چوار سەرۆکایەتییەکەی عێراق کۆبونەوەو دوپاتیانكردهوه كه هەر دەستدرێژییەک بۆ سەر خاکی عێراق رەتكراوەیه. ههروهها جەختیان لەسەر پێویستی پاڵپشتی حکومەت کردەوە بۆ جێبەجێکردنی كارنامهی حکومەت.
ئاوێنه: ئەمڕۆ یهكشهممه، چوار سەرۆکایەتییەکەی عێراق (سەرۆکایەتی کۆمار، وەزیران، ئەنجومەنی نوێنەران، ئەنجومەنی دادوەری) کۆبونهوه.
هەر چوار سەرۆکایەتییەکە جەختییان لەرەتکردنەوەی هەر دەستدرێژییەک کردهوه کە ئاسایشی خاکی عێراق بەئامانج دەگرێت، هەر کردەوەیەکی دوژمناکارانە دژی بنەماکانی دراوسێیەتی باش و هەڕەشەیە بۆ سەر ئاسایش و سەقامگیری لەعێراق ناوچەکە.
لەکۆبونەوەکەدا دوپاتکرایەوە کە چارەسەرکردنی کێشەو ناکۆکییەکان بەگفتوگۆو لێکتێگەیشتن و هاوکاری و هەماهەنگی هاوبەش بەدی دێت.
سەرۆکایەتییەکان جەختیان لەسەر پێویستی پاڵپشتی حکومەت کردەوە بۆ جێبەجێکردنی بەرنامەی حکومەتو پێشکەشکردنی خزمەتگوزاری بۆ هاوڵاتیان، نۆژەنکردنەوەی ژێرخانی کەرتەکانی کارەبا، دروستکردنی نەخۆشخانەو قوتابخانە، دروستکردنی ڕێگاوبانو پرد، پاڵپشتیکردنی کەرتی تایبەت و هاندانی دەرفەتی وەبەرهێنان لەوڵاتدا، بەدەرکردنی یاسایەک کە کارەکانی وەبەرهێنەران ئاسان دەکات، هەروەها چەسپاندنی چاکسازی لە ڕێگەی پێشخستنی هاوکاری تەواو لە نێوان سەرۆکایەتییەکان لە مەلەفی دژە گەندەڵی و پشتگیریکردن لە ڕێکارە حکومی و دادوەرییەکان لەم دۆسیەیەدا.