سابت محەمەد عەباسی، وەزیری بەرگریی عێراق بەسەرۆكایەتی وەفدێكی باڵای سەربازی، گەیشتە ئەنقەرەی پایتەختی توركیاو بڕیارە سبەی پێنجشەممە لەگەڵ هاوتا توركییەكەی كۆببێتەوە.
ئاوێنە: باڵیۆزخانەی عێراق لە ئەنقەرە لە راگەیەندراوێكدا وتی، سابت محەمەد عەباسی، وەزیری بەرگری عێراق، ئێوارەی ئەمڕۆ چوارشەممە، بە سەرۆكایەتی وەفدێكی باڵای سەربازی گەیشتە ئەنقەرەی پایتەختی توركیا، ئەوەش لەسەر بانگهێشتی رەسمی یاشار گولەر، وەزیری بەرگریی توركیا.
بەگوێرەی راگەیەندراوەكە، بڕیارە سبەی پێنجشەممە، لە بینای وەزارەتی بەرگریی توركیا لە ئەنقەرە بەڕێوڕەسمێكی سەربازی پێشوازی لە وەزیری بەرگری عێراق بكرێت و پاشان لەگەڵ هاوتا توركییەكەی كۆببنەوە.
باڵیۆزخانەی عێراق لە ئەنقەرە ئاماژەی بەوەداوە، وەزیری بەرگریی عێراق و وەزیری بەرگریی توركیا لە كۆبونەوەكەی سبەینێیاندا، پرسەكانی ئاسایش و بەرگریی هاوبەش و پرسی هاریكاریی نێوان هەردو وڵات لە پیشەسازییە بەرگرییەكاندا، تاوتوێ دەكەن.