مازن سەباح، بەڕێوەبەری گشتی فەرمانگەی وەبەرهێنان و حەواڵەی دەرەكی لە بانكی ناوەندیی عێراق ئەو لێدوانانە رەتدەكاتەوە كە دراونەتە پاڵی بەوەی پێشبینی كردبێ بەهای 100 دۆلار بۆ 170 هەزار دیناری عێراقی بەرزببێتەوەو دەشڵێت، ئەو هاوڵاتییە عێراقییانەی پارەیان بە دۆلار لە بانكەكان داناوە مافی خۆیان پارەكانیان بە دۆلاری كاش وەربگرنەوە.

ئاوێنە: مازن سەباح، بەڕێوەبەری گشتی فەرمانگەی وەبەرهێنان و حەواڵەی دەرەكی لە بانكی ناوەندی، ئێوارەی ئەمڕۆ پێنجشەممە، لە راگەیەندراوێكدا وتی"ئەو لێدوانانەی لەلایەن ئاژانسی رۆیتەرز دراونەتە پاڵ من، چەند لێدوانێك لەخۆدەگرن كە ئاژانسەكە بە داڕشتنی نادەقیق بڵاویكردونەتەوە."

جەختیشی كردۆتەوە كە بانكی ناوەندیی گەرەنتی هەر پارەیەكی هاوڵاتیان دەكات كە پێشتر بە دۆلار لە هەر بانكێكی عێراقی دانرابێت یان لەساڵی 2024یشەوە دابنرێت، مافێكی تەواوەتی هاوڵاتیانە كە پارەكانیان بەشێوەی دۆلاری كاش وەربگرنەوە.

ئەو بەرپرسەی بانكی ناوەندی جەختی كردۆتەوە كە لە لێدوانەكانیدا بۆ رۆیتەرز پێشبینی ئەوەی نەكردوە كە بەهای 100 دۆلاری ئەمریكا بگاتە 170 هەزار دیناری عێراقی.

وتوشیەتی، بانكی ناوەندی، رێكاری خۆی هەیە بۆ كەمكردنەوەی ئەو جیاوازییەی كە نرخی دۆلاردا هەیە لەنێوان نرخی بازاڕو نرخی رەسمیداو هیچ ئاماژەیەك نییە بۆ ئەوەی نرخی دۆلار بگاتە 170 هەزار دینار، بەپێچەوانەوە رێكار هەن بۆ دابەزاندنی نرخی دۆلار.

ئەوەشی خستۆتەڕو، لێدوانەكە لەبارەی 1/1/2024 وەهایە كە لەو بەروارەوە راكێشانی دۆلاری كاش تەنها حەواڵەكان لە دەرەوەی عێراق دەگرێتەوەو بەهیچ شێوەیەك پارەی دانراوی هاوڵاتیان لە بانكەكان ناگرێتەوەو دەتوانن دۆلاری كاش وەربگرنەوە.