حەوتەوانە

هۆشیار عەبدوڵا
  2019-02-26     917

یەک:
گۆڕان رای لەسەر خراپیی سیستمی سیاسیی هەرێم نەگۆڕاوە، بەڵكو سورە لەسەر ئەوەی کە ئەم سیستمە خراپەو بێ کەڵکەو دەبێت چاک بکرێت هەر لەوپێناوەشدا زۆرینەی جڤات بڕیاری بەشداریکردنی لە حکومەتدا داوە، واتا گۆڕان بەشدارە نەک بۆ ئەوەی ببێتە بەشێک لە سیستم بەڵکو بۆ گۆڕینی سیستم بەشدارە.

دو:
ئەوە گۆڕان نەبو لەگەڵ خۆیدا بوغزو کینەی سیاسیی هێنا، بەڵکو لەگەڵ لەدایکبونی گۆڕاندا بو کە بە بوغزو کینەیەکی سیاسی زۆرەوە مامەڵەی لەگەڵدا کرا، گۆڕان زۆر هاواری کرد دژی نەخۆشەکە نیە هاتوە نەخۆشیەکە لەناوبەرێت، ئەوان بون کێشەکانیان لەگەڵ گۆڕان گەیاندە لوتکەی دژایەتی و دوژمنایەتی.

سێ :
گۆڕان هات بۆ ئەوەی ململانێی سیاسیی بکاتە دۆخێکی تەندروست، هات خەباتی مەدەنی بکاتە مۆدێل، هات کۆمەڵگە هۆشیار بکاتەوەو کردی، ئەو هێزە بو کە رەخنەی سەرپێخست و چەکەکانی بێدەنگ کرد، ئەوە گۆڕان نەبو کە نەزانێ ململانێی مەدەنی چیە، ئەوە ئەوان بون کە بە جۆرەها شێوە پەلاماری گۆڕانیانداوەو توندوتیژیان بەرامبەر بەکارهێناوە، لە بەرامبەردا تاکە یەکجاریش گۆڕان پەنای بۆ توندوتیژی نەبردوە.

چوار:
گۆڕان بەم بەشداریەی لە حکومەت بلیتی پاکبونەوە ناداتە کەس، دیدی لەسەر بەدکاریەکانی رابردو نەگۆڕاوە بەڵام گۆڕان بۆ سبەی و ئایندە دەڕوانێت و نەچەقیوە لە گرێکانی رابردودا، بەڵکو هاتوە بە داڕشتنی بەرنامەیەکی کار بۆ کابینەی نۆ، بەرپرسیارێتی لەسەر لایەنە بەشداربوەکان زیادکردوەو باری شانی خۆی و ئەوانی تریشی بە بەرنامەیەکی سیاسیی بۆ چاکسازی قورسکردوە.

پێنج:
گۆڕان حزبی ریفۆرم و بەرنامەیە، تا ئەوکاتەش دەتوانێت بژیت کە دەستدەگرێت بەو بەرنامەیەوە، بەڵام بۆ جێبەجێکردنی بەشێک لەو بەرنامەیە پێویستی بە گۆرینی ئالیەت و هۆکارو پێداویستی قۆناغەکان هەیە کە مەرج نیە تەنها ئۆپۆزسیۆن یان لەدەسەڵاتا بون بێت، گرنگ دەستگرتنە بە ئامانجەکانەوە هەمو ئالیەتێکی مەشروع بۆ هێنانەدیان رەوایە.

شەش:
هەمو قۆناغێک بەرپرسیارێتیەک دەکاتە ئەولەویەت، بۆ ئەم قۆناغە کە گۆڕان پێیایدا تێدەپەرێت بەشداری لە دەسەڵات بە باش زانراوە، ئەوە بە مانای ئەوە نیە کاتێک بزانێ کێشە لە جێبەجێکردندایە سەبری ئەیوبی هەبێت و سڵیش ناکاتەوە لەوەی لەسەر بەرنامەکەی هەمو ململانێیەک بکات و دە جاری تر لە حکومەت بێتە دەرەوەو دەیتر بچێتە حکومەتەوە، گرنگ جێبەجێکردنی بەرنامە چاکسازیەکەیە، گۆرانخوازان ئەو گوتەزا پڕ حیکمەتەی کاک نەوشیروان کە وتی عیبرەت لە جێبەجێکرندایە نەک لە نوسیندا لایان قاعیدەیەکی گرنگەو لێی لانادەن.

حەوت:
لە وەفاتی کاک نەوشیروانەوە تا ئەم لەحزەیە، دەیان پیلان و موئامەرە لەسەر گۆڕان هەن، ئەو پیلانانە لەگەڵ چەندین هەڵەی ناوخۆیی وایکردوە کە گۆڕان قورسایی دو خولی رابردوی لە پەرلەماندا نەمێنێت، روداوەکانی رابردو هەمویان بە ئاشتی و ناکۆکیەکانەوە، لە رێکەوتن و ترازانەکانەوە وایانکردوە گۆڕان نەفەسێکی واقعی تر لە سیاسەتکردندا بگرێتە بەر بەشێوەیەک کە سیاسەت چیتر لای گۆڕان هەر ململانێ نیە بەڵکو لەپاڵ ململانێدا مناوەرەو هاوسەنگی راگرتن و خوێندنەوەی واقعی سیاسی سەر ئەرزە وەک خۆی.

ئەگەر لەسەرەتاوە و لە 2009وە،  گۆڕان وەک هێزێکی ریفۆرمخواز وەرگیرایەو گۆڕانخوازان سزای سیاسی نەدرابان و بە جۆرەها شێوە توندوتیژی لەدژی گۆڕان ئەنجام نەدرایە، ئەگەر لەسەرەتاوە هۆشداریە پێشوەختەکانی گۆڕان لە بواری سەربازی و دارایی بە هەند وەربگیرانایە، پەیام و روبەڕوەکانی نەوشیروان مستەفا بە چاوی بەرژەوەندی نیشتیمانی سەیربکرانایە نەک چاویلکەی حزبی، دەزانرا کە گۆڕان پرۆژەیەکی مەدەنیی نەفەسدرێژە بۆ گۆڕانکاری.

ئەوانەی گۆڕان بەوە تۆمەتبار دەکەن کە پێشتر بەرامبەرەکانی بە دوژمن و شەیتان کردوەو ئێستا پەشیمانە خۆیان لەو هەمو دوژمنکاریەی دژی گۆڕان کراوە، لادەدەن و ناڵێن لەسەرەتاوە گۆڕان لەبری وەرگرتنی وەک پرۆژەیەکی نیشتیمانی وەک موئامەرەو تەخوین و مەترسی بۆسەر هەرێم ململانێی لەگەڵدا کراو هەوڵی سڕینەوەی دراوە بە جۆرەها شێوە.

گۆڕان پرۆژەیەکی مەدەنیی ریفۆرم خوازە لەو پێناوەشدا بەردەوامە.

زۆرترین بینراو
© 2020 Awene Online, Inc. All Rights Reserved.
×