دڵشاد شەهاب، وتەبێژی سەرۆکایەتیی هەرێمی کوردستان رایگەیاند، رۆژی شەممە، نێچیرڤان بارزانی سەردانی بەغدا دەکات و چاوی بە محەممەد شیاع سودانی، سەرۆك وەزیرانی عێراق دەکەوێت.
ئاوێنە: دڵشاد شەهاب، وتەبێژی سەرۆکایەتیی هەرێمی کوردستان بە میدیای پارتی وت، سەرۆکی هەرێمی کوردستان لەسەر مەلەفی بودجە و موچە، نەوت و هەناردەکردنەوەی، پەیوەندییەكانی هەولێرو بەغدا، گفتوگۆ لەگەڵ بەرپرسانی عێراق دەکات.
دڵشاد شەهاب وتی، "بەپێی یاسا و وەکو کارەکتەرێکی کاریگەر و بەهێزی کوردستان و عێراق، نێچیرڤان بارزانی بەرپرسە لە رێکخستنی پەیوەندییەکانی نێوان هەولێر و بەغدا، چارەسەرکردنی کێشە و تەنگژەکان، نەهێشتنی گرفتە ئابورییەکان لەنێویاندا مەلەفی بودجە و موچە و نەوت".
وتەبێژی سەرۆکایەتیی هەرێمی کوردستان ئاماژەی بەوە کرد، "نێچیرڤان بارزانی لە بەغدا جەخت دەکاتەوە لەسەر جێبەجێکردنی خاڵەکانی رێککەوتنی لایەنەکانی چوارچێوەی هەماهەنگی، کە حکومەتی لەسەر دامەزراوە و بەڵێنی جێبەجێکردنیان دراوە، بەڵام لە راستیدا جێبەجێ نەکران".
دڵشاد شەهاب وتیشی"نێچیرڤان بارزانی مەبەستیەتی نێوانی هەولێر و بەغدا تۆکمە و باش و دۆستانە بێت، بە قسە و لێدوانی میدیایی تێکنەچێت و لە داهاتودا خەڵک باجەکەی بدات و ببێتە هۆکاری دواخستن و خەرج نەکردنی موچەی خەڵکی کوردستان."