جارێكی دیكە دابەشكردنی مووچەی فەرمانبەران دواكەوت و هێشتا پارە لە بەغداوە ڕەوانەی هەرێم نەكراوە و كاتی ڕاگەیاندنی خشتەی مووچەش نادیارە، هاوكات فەرمانبەران و مامۆستایان زەنگی بایكۆتی دەوام لێدەدەن.

ئەمڕۆ هەینی 3ی ئایارە و هێشتا پارەی مووچە لەلایەن وەزارەتی دارایی عێراقەوە ڕەوانەی هەرێم نەكراوە و هیچ خشتەیەكی مووچەش لەلایەن وەزارەتی دارایی هەرێمەوە ڕانەگەیەنراوە و چاوەڕێی ناردنی پارەن لە بەغداوە.

ماوەی زیاتر لە 15 ڕۆژە لیستی مووچەی مانگی 4ی مووچەخۆر انی هەرێم ڕەوانەی بەغدا كراوە، بەڵام بەهۆی وردبینی و چەند داواكارییەكی دیكەی عێراق ناردنی پارە بۆ هەرێم دواخراوە، بەڵام دابەشكردنی مووچەی مانگی 4 لە عێراق كۆتایی هاتووە و دەست بە مووچەی مانگی 5 كراوە لەكاتێكدا بەپێی بڕیاری دادگای فیدڕاڵی دەبێت مووچەی مووچەخۆرانی هەرێم لەگەڵ عێراق بدرێت.

هاوكات، فەرمانبەران و مامۆستایان لە تۆڕە كۆمەڵایەتییەكان نیگەرانی خۆیان لە دواكەوتنی جارێكی دیكەی مووچە دەردەبڕن و ڕایدەگەیەنن، ئەگەر سەرەتای ئەم هەفتەیە مووچە نەدرێت بایكۆتی دەوام دەستپێدەكەنەوە.

لەگەڵ دابەشكردنی مووچەی مانگی 3 دوابەدوای مووچەی مانگی 2 لە پێش جەژنی ڕەمەزان و لە سەرەتای مانگی 4دا، ڕاستەوخۆ دەوامی فەرمانبەران زیادكرایەوە بەبیانووی ئەوەی لەمەودوا مووچە دواناكەوێت و مانگانە لەگەڵ عێراق مووچەی هەرێمیش دابەش دەكرێت، بەڵام تا ئێستا بۆ ڕۆژی یەك شەممەش، كە دەوامی فەرمی دەستپێدەكاتەوە و دەبێت 5ی ئایار هیچ دەنگۆیەك بۆ هاتنی پارە و دابەشكردنی مووچە نییە.