تێك چوونا رەوشا كارەبێ كێم بوونا دەمژمێرێن كارەبا نیشتیمانی بوویە ل كوردستانێ بگشتی تایبەتی ل دهوكێ بویە جهێ گلەیی و گازندەین هاولاتیان بتایبەتی د وەزرێ زڤستانێ دا ژبەركو خواست لسەر كارەبا نشیتیمانی زێدە دبیت.
ئاوێنە، رارهێل نێروەی: عەبدولصەمەد تێلی، سەروكێ لژنا سوتەمەنیێ ل جڤاتا پارێزگەهێ دیار كر: برێیا جڤات و ئیدارا پارێزگەهێ پێنج ملیون لیترێن گازێ بۆ دهوكێ هاتنە دابینكرن و بهایێ ئەمپێری كارەبێ پێ هاتە كێمكرن.
گوت ژی: ئەو بهایێن بۆ هەیڤا كانوونا ئێكێ هاتینە دان رەنگە بۆ كانوونا دووێ ژی بهێتە جێ بەجێ كرن، رەنگە بڤی سیستەمێ نوكە سەرەدەری دگەل كارەبێ بهێتە كرن هەتا 20 سالێن دی ژی رەوشا كارەبێ باش نابیت. پێشبینی دهێتە كرن ئەڤ سیستەمێ نوو یێ ( سمارت مەتر ) تشتەكێ نوو بیت و كارەب ب هەدەر نەچیت.
سەرۆكێ لژنا سوتەمەنیێ گوت ژی: وێستگەهێ دهوك پشت بەستنێ لسەر دكەت بۆ كارەبێ ویستگەها كواشێ یە، بۆ هەر موالیدەكێ پێدڤی ب 863هزار لیتران هەیە، ئانكو ئەڤ ویستگەهە پێدڤی ب نێزیكی 7ملیون لیتران هەیە ئەڤە ژی هندێ گەهینیت ژلایێ ئابوری ڤە سەركەفتی نینە، گوت ژی: هەر چەندە ئەڤ وێستگەهە ێت غازێنە، لێ نوكە غاز ل دهوكێ ناهێتە بەرهەم ئینان ژبەر هندێ ب گازێ كار دكەن.د نها دا بەهرا دهوكێ ژ كارەبا نیشتیمانێ 24,5% دهێتەدان.
ناڤهاتی گوت ژی: وێستگەهێ كواشێ 1000 میگاواتیە، رۆژانە 50 – 100میگاواتێن بەرهەم دئینان ژبەر نەبونا گازێ، وێستگەهێ باعەدرێ 150میگاواتیە، ئەڤ وێستگەهە ب فلورینێ كار دكەت (بەرمایكێن گازێ) لەورا تێچوویا وێ كێمە ژبەر هندێ بەردەوام 130 -140 میگاواتان دەتە دهوكێ، سەرجەمێ هزار و 189 میگاواتان بووینە 250 هەتا 300 میگاوات، دوو هێلێن دی ژ پارێزگەهێن دی یێن 132 نە هەر ئێك ژ وان 200میگاواتێن كارەبێ ڤەدگوهێزن.
ئاشكرا ژی كر: زێدەتری 50 نڤیسارێن فەرمی ئاراستەی لایەنێن پەیوەندی دار كریە، لێ حكومەت دبێژیت ژبەر قەیرانا دارایی نەشێن گازێ دابین بكەن و چ وێستگەهێن نوی دروست بكەن.پشتی چەندین گڤاشتن هاتینە كرن حكومەتا هەرێمێ رەزامەندی بۆ دوو هێلێن 132 بۆ دهوكێ بهێنە دانان، بڤێ چەندێ ژی دهوك دشێت 750 میگاواتێن كارەبێ ژ سەنتەرێ وەربگریت دگەل یێن كواشێ و باعەدرێ دشێت رێژا كارەبا نیشتیمانی بۆ دهوكێ دابین بكەت، لێ ئەڤە وێ چەندێ كارەبا نیشتیمانی ببیتە 24 دەمژمێری.
