ستایشکردن بە مانای پێزانین و ھاندان لە بەرانبەر ئەنجامدانی ڕەفتارێکی ئەرێنی لەلایەن کەسی بەرانبەرەوە. ئەمە بە شێوەیەکی گشتی، بەڵام بۆ قوتابیان و فێرخوازان کاریگەرییەکەی گرنگتر و بەبەھاتر دەبێت، چونکە قوتابیان و خوێندکاران بنەمای دروستکردنی کۆمەڵگەیەکی پێشکەوتوو و بەھێزن بۆ داھاتووی ھەر نەتەوەیەک.
بە پێچەوانەوە، ڕق و کینە و ڕەفتاری شەڕەنگێزی کۆمەڵگە دەکاتە کۆیلەی ڕق و تۆڵەسەندنەوە، کە بەرھەمەکەی کار و ڕەفتاری نەشیاو و ناشیرینە؛ لە کەسێتی تاکدا دەردەکەوێت و لە ناو کۆمەڵدا ڕەنگ دەداتەوە.
ستایشکردنی ڕەفتارە باشەکان ڕێگایەکی گرنگە بۆ بەھێزکردنی ھەستی متمانە بەخۆبوون و ھاندانی قوتابیان بۆ بەردەوامبوون لە کارە باشەکان. کاتێک قوتابی بەھۆی ڕەفتاری جوان، ھاوکاری، ڕێزگرتن لە کەسانی تر، پابەندبوون بە یاساکانی قوتابخانە یان یارمەتیدانی ھاوڕێکەی ستایش دەکرێت، ھەست دەکات کە ھەوڵەکانی بینراون و بەھادارن.
ستایشکردن تەنھا بە وشەی «باشە» یان «ئافەرین» کۆتایی نایەت؛ بەڵکو باشترە ستایشەکە ڕاستەوخۆ و دیاریکراو بێت. بۆ نموونە، مامۆستا دەتوانێت بڵێت: «زۆر باشە، ئەمڕۆ یارمەتی ھاوڕێکەت دا و ئەمە ڕەفتارێکی زۆر جوانە». ئەم شێوەیە یارمەتیدەدات قوتابی بزانێت کام ڕەفتارەی جێی ستایش بووە.
ھەروەھا پێویستە ستایشکردن بە شێوەیەکی دادپەروەرانە و بێ جیاوازی بێت، چونکە ھەر قوتابییەک توانای تایبەتی خۆی ھەیە. نابێت تەنھا ئەو قوتابیانە ستایش بکرێن کە نمرەی بەرزیان ھەیە؛ بەڵکو ھەوڵدان، ڕەفتاری باش، ھاوکاری، پاکوخاوێنی، پابەندی و ڕێزگرتنیش شایستەی ستایشکردنن.
وشەیەکی جوان و ستایشێکی لە شوێنی خۆیدا دەتوانێت ھانی قوتابی بدات کە باشتر ھەڵسوکەوت بکات و ببێتە نموونەیەکی باش بۆ ھاوڕێکانی. بۆیە، پێویستە مامۆستا و دایک و باوکان ھەوڵ بدەن ڕەفتارە باشەکان ببینن، ستایشیان بکەن و قوتابیان بۆ بەردەوامبوون لە کارە چاکەکان ھان بدەن.
لێرەدا گرنگترین کاریگەرییەکانی ھاندان و ستایشکردن لەسەر فێرکردن و پرۆسەی پەروەردە ڕوون دەکەینەوە:
١. کاریگەری دەروونی و سۆزداری
ڕ- کەمکردنەوەی دڵەڕاوکێ: ترسی منداڵ لە ھەڵەکردن دەڕەوێنێتەوە و وا دەکات بە ئارامی گوێ بگرێت.
ب- زیادبوونی متمانە بە خۆبوون: کاتێک منداڵ بە شێوازێکی خۆش و ھاندەرانە مامەڵەی لەگەڵ دەکرێت، زیاتر دەوێرێت بەشداری بکات و پرسیار بکات.
ج- دروستکردنی پەیوەندی بەھێز: خۆشەویستی و متمانە لە نێوان منداڵەکە و مامۆستا یان دایک و باوکدا بەھێزتر دەکات.
٢. گەشەی ھزری و توانای فێربوون
ڕ- زیادکردنی سەرنج و وردبینی: ھاندان و قسەی خۆش وەک موگناتیسێک وایە کە سەرنجی منداڵەکە ڕادەکێشێت و ڕێگری دەکات لە بێزاربوون.
ب- باشترکردنی بیرەوەری: مێشکی مرۆڤ ئەو زانیارییانەی کە لەگەڵ ھەستی خۆشیدا (پێکەنین یان دڵخۆشیدا) بەستراونەتەوە، زۆر ئاسانتر پاشەکەوت دەکات و درەنگتر لەبیری دەکات.
ج- ھاندانی داھێنان: ژینگەی شاد و ئازاد و ئارام وا لە منداڵ دەکات داھێنەرانە بیر بکاتەوە و چارەسەری نوێ بۆ کێشەکان بدۆزێتەوە.
٣. کاریگەری کۆمەڵایەتی و ڕەفتاری
ڕ- حەزکردن بە خوێندنگە و فێربوون: منداڵەکە چیتر پرۆسەی خوێندن وەک سزایەک نابینێت، بەڵکو وەک چالاکییەکی خۆش سەیری دەکات.
ب- فێربوونی ڕەوشتی بەرز: منداڵ لە ڕێگەی چاودێریکردنی زمانی شیرینی گەورەکانەوە، خۆیشی فێری قسەی خۆش، نەرمونیانی و ڕێزگرتن لە ئەوانی تر دەبێت.
چۆنیەتی دروستکردنی ھاوسەنگی لە نێوان قسەی نەرمونیان و خۆش و پاراستنی سنووری ڕێزگرتن.
ھێنانەوەی نموونەی کرداری بۆ وتنی قسەی خۆش لە کاتی وانەوتنەوەدا، لە بابەتە جیاوازەکاندا (زانستەکان، بیرکاری و زمان).
لێرەوە دەگەینە ئەوەی کە ھاندان و نەرمونیانی و وتەی خۆش و شیرین، ھەنگاوەکانی پرۆسەی پەروەردە دەگەیەنێتە ئامانجی بەرز.