ئەمینداری گشتی كەتیبەكانی حزبوڵای عێراق رایگەیاند، هێرشەكانیان بۆ سەر هێزەكانی ئەمریكا لە ناوچەكە رادەگرن ئەوەش لەپێناو شەرمەزار نەكردنی حكومەتی عێراق.
ئاوێنە: ئەبو حسێن حمێداوی، ئەمینداری گشتی كەتیبەكانی حزبوڵای عێراق، ئەمشەو سێشەممە، لە راگەیەندراوێكدا وتی، "ئەوان وەك بەشێك لە مقاوەمی ئیسلامی بەئیرادەی خۆیان و بە بێ دەستوەردانی هیچ لایەنێكی دیكە، بڕیاری پشتیوانیكردنی لە خەڵكی ستەملێكراوی غەززە داوە."
ئاماژەی بەوەشداوە، "برایانی ئێمە لە مقاوەمە، بەتایبەت لە كۆماری ئیسلامی ئێران، ئاگاداری چۆنیەتی كاری جیهادی ئێمە نەبون و زۆر ناڕازی بون لە گوشار و توندكردنەوەی هێرشەكانی بۆ سەر هێزە داگیركەرەكانی ئەمریكا لە عیراق و سوریا."
ئەوەشی خستۆتەڕو، لەپێناو شەرمەزار نەكردنی حكومەتی عێراق راگرتنی هێرشە سەربازی و ئەمنییەكانمان دژبە هێزەكانی ئەمریكا رادەگەیەنین و بەشێوەیەكی دیكە بەرگری لە گەلەكەمان لە غەززە دەكەین.
ئەبو حسێن حمێداوی داوای لە چەكدارانی كەتیبەكانی حزبوڵا كردوە بەرگری لەخۆیان بكەن لەكاتی هەر كردەوەیەكی ئەمریكادا لەدژیان.