2019-09-07   916     
كاربەدەستانی ئێران رایانگەیاند، دەستیان بەسەر كەشتێكی نەوت هەڵگری بیانیدا گرتووە لە كەنداوی عەرەبی، بە بیانووی ئەوەی سووتەمەنی بە قاچاغ دەگواستەوە، هەروەها ١٢ کەسی بەڕەگەز فلیپینی كە لە نێو كەشتێكدابوون دەستگیركراون.
ئاوێنه: لەوبارەوە فەرماندەی هێزی دەریاوانی ئێران لە پارێزگای هورمزگان باشووری ئەو وڵاتە، عەقید حوسێن دەهكی لە لێدوانێكدا بۆ ئاژانسی هەواڵیی فارس ئاشكرایكردووە، هێزەكانیان دەستیانگرتووە بەسەر كەشتیەكی نەوتی هەڵگری بیانی لە كەناراوەكانی سیریك لە كەنداوی عەرەبی كە بە قاچاغ سووتەمەنی ئێرانی دەگواستەوە.
عەقید حوسین دەهكی ئاماژەی بەوەشكردووە ئەو كەشتییەی كە دەستی بەسەردا گیراوە، ٢٨٣ هەزار و ٩٠٠ لتر سووتەمەنی بە قاچاغ هەڵگرتبوو كە بەهاكەی، ٣٢٠ ملیار ڕیاڵ (حەوت ملیۆن و ٦٠٠ هەزار دۆلارە).
ناوبراو باسی لەوەشكرد، ١٢كەس كە هەڵگری رەگەزنامەی فلیپینین و لە نێو كەشتییەكەدابوون، دەستگیركراون و ڕهوانهی لێكۆڵینەوە كراون.