نرخی نەوت بەردەوامە لە دابەزین و ئەمڕۆ هەینی بۆ نزمترین ئاست لە ماوەی چوار ساڵی رابردودا دابەزی.
ئاوێنە: لە ئێستادا نرخی یەك بەرمیل نەوتی خاوی برێنت لە بازاڕەكانی جیهاندا بە 64 دۆلار و 82 سەنت و نرخی یەك بەرمیل نەوتی خاوی تەكساس بە 61 دۆلار و 44 سەنت مامەڵەی پێوە دەكرێت.
ئەوەش نزمترین ئاستی نرخی نەوتە كە لەدوای ساڵی 2021ەوە لە لوتكەی بڵاوبونەوەی پەتای كۆرۆنادا بۆ نزمترین ئاست دابەزی.
دوای ئەوەی شەوی چوارشەممە، دۆناڵد ترەمپ، سەرۆكی ئەمریكا سەپاندنی پێناسی نوێی گومرگی بەسەر هاوردەی كاڵای زۆربەی وڵاتاندا راگەیاند، نەوت دەستی بە دابەزین كردو دوێنێش كۆبونەوەی وڵاتانی ئۆپیك پڵەس كە تێیدا بڕیاریاندا لە مانگی داهاتوەوە بڕی بەرهەمهێنانی نەوت زیاد بكەن، ئاستی دابەزینی نرخی نەوتی زیاتر كرد.
خێرابونی دابەزینی ئەمڕۆی نرخی نەوتیش كە لە سەرلەبەیانییەوە تاوەكو ئێستا نزیكەی پێنج دۆلار لە بەهای خۆی لەدەستداوە، دوای ئەوە هات كە چین رایگەیاند، لە 10ی ئەم مانگەوە پێناسی گومرگی زیاتر بەڕێژەی لەسەدا 34 بەسەر سەرجەم كاڵا ئەمریكییەكاندا دەسەپێنێت. ئەوەش لەكاتێكدایە كە وڵاتانی دنیا ئامادەكاری دەكەن بۆ بەرپەچدانەوەی هەنگاوەكەی ترەمپ بە سەپاندنی پێناسی گومرگی بەسەر كاڵاكانی ئەو وڵاتەدا.