کیر ستارمەر، دەستی لەپۆستی سەرۆک وەزیرانی بەریتانیا کێشایەوە،  ئەو حەوتەمین سەرۆک وەزیرانە کە لە ماوەی ١٠ ساڵدا دەستی لەکارکێشاوەتەوە، ئەو دەڵێت "گوێم لەپارتەکەم گرت".

ئاوێنە: بەرەبەیانی ئەمڕۆ دووشەممە (22.06.2026)، کیر ستارمەر، سەرۆکوەزیرانی بەریتانیا دەستلەکارکێشانەوەی خۆی لە پۆستی سەرۆکی پارتی کرێکاران ڕاگەیاند، پێشبینی دەکرێت پێش مانگی ئەیلول ناوی سەرۆکی نوێی پارتەکە ئاشکرابکرێت، کە پەرلەمان کارەکانی دەستپێدەکاتەوە، ئەمەش ڕێگە خۆش دەکات بۆ ئەوەی وڵاتەکە حەوتەمین سەرۆکوەزیرانی لەماوەی 10 ساڵدا هەبێت.

کەمتر لە دوو ساڵ دوای سەرکەوتنە گەورەکەی پارتی کرێکاران لەهەڵبژاردنە گشتییەکانی مانگی تەمموزی ٢٠٢٤، ستارمەر وتی "ڕوونە کە پارتەکە دەیەوێت ئەو لە هەڵبژاردنەکاندا دەربچێت".

وتیشی "ئەو پرسیارەی ئێستا پارتەکەم دەیکات ئەوەیە کە ئایا من لە باشترین دۆخدام بۆ ئەوەی بەرەو هەڵبژاردنی داهاتووی ببەم؟ وەڵامی حزبەکەمم بیستووە بۆ ئەو پرسیارەو بە نیازپاکییەوە قبوڵم کردووە"، جەختیشی لەوە کردەوە کە "هەموو ئەو بڕیارانەی داویانە ئامانجیان "پێشخستنی ئەم وڵاتە بووە کە خۆشم دەوێت". 

ستارمەر وتی "دەست لە پۆستی سەرۆکی پارتی کرێکاران دەکێشمەوە".

ڕوونیشی کردەوە کە کاندیدکردن بۆ جێنشینەکەی وەک سەرۆکی پارتی کرێکاران لە ٩ی تەمموز دەکرێتەوەو پرۆسەکە تا پشووی هاوینە تەواو دەبێت، واتە پێش مانگی ئەیلول ناوی سەرۆکی نوێی حزبەکە دەهێنرێت. تا ئەو کاتەش لە پۆستەکەیدا دەمێنێتەوە.

ستارمەر ئاماژەی بەوەش کرد کە "حکومەتێکی نوێی پارتی کرێکاران، یەکەمجارە لە ماوەی ١٤ ساڵدا. لاپەڕەیەکی نوێ لە مێژووی وڵاتەکەماندا دوای چەندین ساڵ لە نائومێدی و چەقبەستوویی کراوەتەوە، دەرفەتی گۆڕینی ژیانی ملیۆنان کەس بۆ باشترکردن پێشکەش دەکات. هەر ئەمەش بووە هۆی ئەوەی کەوتمە ناو سیاسەتەوە. گەشت بۆ ئەو خاڵە ئاسان نەبوو. شەش ساڵ لەمەوبەر پارتی کرێکارانم گرتە ئەستۆ کە لەڕووی سیاسی و دارایی و ئەخلاقییەوە مایەپووچ بوو. دووبارە و سێبارە پێم دەگوترا کە پارتەکەم تەواو بووە، ئێستا سەر بە ڕابردووین و بەدەستهێنانی زۆرینە لە هەڵبژاردنێکی گشتیدا – چ جای سەرکەوتنێکی زەمینەسازی – مەحاڵە. ئەو بووچوونانەمان پووچەڵ کردەوە، چونکە حزبەکەمان گۆڕی".

لە بەشێکی دیکەی وتەکانیدا وتی "ئەم هەوڵە سەختە بۆ گۆڕانکاری یەک ئامانجی هەبوو: دەسەڵات نەبوو لەپێناو دەسەڵاتدا، بەڵکو باشترکردنی بەریتانیا بوو، دروستکردنی وڵاتێکی دادپەروەرتر، لەسەر بنەمای کەرامەت و ڕێزگرتن، کە هەموو کەسێک بناسرێت، هەموو کەسێک بەهای هەبێت و سامان و دەرفەت بۆ هەموو کەسێک بێت و تەنها بۆ کەسانی کەم ئیمتیازدار نەبێت".

دواجار سەرۆکوەزیرانی دەستلەکارکێشاوە کاتێک ئاماژەی بە هاوسەر و منداڵەکانی کرد و وتی "کاتێک گرنگترین کار جێدەهێڵم، باشترین هاوسەر دەبم بۆ هاوسەرەکەم کە هاوکارم بوو، باشترین باوک دەبم بۆ منداڵەکانم " .

ستارمەر لە میانی پەیامەکەیدا ڕایگەیاند کە بەیانی ئەمڕۆ لەگەڵ شا چارڵز قسەی کردووە بۆ ئەوەی لە بڕیاری دەستلەکارکێشانەوەی ئاگاداری بکاتەوە.

لە هەمان کاتدا ڕایگەیاند کە داوای لە دەستەی بەڕێوەبەری نیشتمانیی پارتی کرێکاران کردووە کە خشتەیەکی کاتی بۆ جێنشینی پارتی کرێکاران دابنێن، لەگەڵ دەستپێکردنی پێشکەشکردنی کاندیدەکانی سەرکردایەتی کە لە ٩ی تەمموزەوە دەست پێدەکات و تەواوکردنی ئەو پڕۆسەیە کە بڕیارە کۆتایی پشووی هاوینە بێت.

ئەندی بێرنهام، سەرۆکی شارەوانی بەناوبانگی مانچستەری گەورە و پاڵێوراوێکی بەهێز بۆ جێگرتنەوەی کیر ستارمەر ، بڕیارە نزیکەی کاتژمێر ٢.٣٠ی پاشنیوەڕۆ (بەکاتی ناوخۆیی) بە فەرمی سوێندی یاسایی بخوات وەک پەرلەمانتار. هەنگاوێکی پێویستە بۆ ئەوەی ببێتە سەرۆکی پارتی کرێکاران و دواتر سەرۆکایەتی حکومەت.

ئەندی بێرنهام کە تا ئەم دواییانە سەرۆکی شارەوانی مانچستەر بووە و ئێستا پەرلەمانتارە، وەک ئەو کەسایەتییە دەرکەوتووە کە لایەنگرانی پارتی کرێکاران زیاتر و زیاتر لە دەوری کۆدەبنەوە.

زۆرێک لە پەرلەمانتاران پێیان وایە ئەو توانای پەیوەندیکردن بەهێزترە و سەرنجی زیاتری بۆ دەنگدەران هەیە بەراورد بەستارمەر کە لە ساڵانی ڕابردوودا جەماوەرییەکەی بە شێوەیەکی بەرچاو دابەزینی بەخۆیەوە بینیوە.

بەپێی زانیارییەکان، بێرنهام خۆی بانگەشە بۆ گواستنەوەیەکی بێ کێشە دەکات، ئەمەش پێشنیاری ئەوە دەکات کە ستارمەر بۆ ماوەیەکی کاتی لە پۆستی سەرۆکوەزیراندا بمێنێتەوە تا پرۆسەی جێنشینی تەواو دەبێت.

لە ساڵی ٢٠١٦ تا ئێستا سەرۆکوەزیرانی بەریتانیا یەک لە دوای یەک دەیڤید کامیرۆن، تێریزا مەی، بۆریس جۆنسۆن، لیز تروس، ڕیشی سوناک و کیر ستارمەر دەستیان لەکار کێشاوەتەوە.