کازم غەریب ئابادی، جێگری وەزیری دەرەوەی ئێران، کۆتاییهاتنی گفتوگۆ تەکنییەکانی لەگەڵ ویلایەتە یەکگرتووەکانی ئەمریکا لە چوارچێوەی ئەو دانوستانانەی لە سویسرا بەڕێوەدەچن بە نێوەندگیریی قەتەر و پاکستان بۆ کۆتاییهێنان بە جەنگ ڕاگەیاند، ئەمەش بەپێی ئەوەی کە میدیا فەرمییەکانی ئێران ئەمڕۆ سێشەممە بڵاویانکردووەتەوە.
ئاوێنە: ئاژانسی هەواڵی فەرمیی ئێران (ئیرنا) لە ڕێگەی ئەپڵیکەیشنی "تێلێگرام"ەوە ئاماژەی بەوە کردووە کە "کازم غەریب ئابادی کۆتاییهاتنی گفتوگۆکانی نێوان هەر چوار وڵاتەکە و گەیشتن بە ڕێککەوتن لەسەر چوارچێوەی دانوستانەکانی داهاتووی ڕاگەیاندووە".
ئاژانسەکە ئەوەشی گوتووە کە "بڕیاریش دراوە چوار گرووپی کار پێکهێنرێن کە تایبەت دەبن بە کۆتاییهێنان بە سزاکان، کاروباری ئەتۆمی، ئاوەدانکردنەوە و گەشەپێدانی ئابووری، هەروەها چاودێریکردن و جێبەجێکردن".
لەلای خۆیەوە، محەممەد باقر قالیباف، سەرۆکی پەرلەمانی ئێران و سەرۆکی شاندی دانوستانکار، ڕایگەیاند کە تاران "بەڕێوەبردنی گەرووی هورمز" دەگرێتە ئەستۆ. بەپێی گواستنەوەی (ئیرنا)، قالیباف زیاتر گوتی: "گەرووی هورمز هەرگیز ناگەڕێتەوە بۆ بارودۆخی پێش جەنگ، ئێران بەڕێوەی دەبات، ئەوەش بە جۆرێک کە لەگەڵ یاسا نێودەوڵەتییەکاندا یەکبگرێتەوە".
قالیباف لە گرتەیەکی ڤیدیۆییدا کە لە هەژماری خۆی لە ئەپڵیکەیشنی "تێلێگرام" بڵاویکردووەتەوە، جەختی لەوە کردەوە کە ئەو دانوستانانەی لە سویسرا بەڕێوەچوون، "دەستکەوتی باشیان" لێکەوتووەتەوە. هەروەها گوتی: "لە تێڕوانینی منەوە، ئەم گەشتە دەستکەوتی باشی هەبوو، بەتایبەتی لە پەیوەندی بە گفتوگۆکانی سەر گەرووەکە، دانوستانەکانی لوبنان، پرسی بەخشینی نەوت لە سزاکان، و ئازادکردنی پارە بلۆککراوەکان".
هەروەها تاران و واشنتن ڕێککەوتن لەسەر دروستکردنی "هێڵێکی پەیوەندی" بۆ خۆلادان لە ڕوودانی "پێشهات و تێنەگەیشتن" لە گەرووەکەدا، بە مەبەستی "زامنکردنی تێپەڕبوونی سەلامەتی کەشتییە بازرگانییەکان بە گەرووی هورمزدا"، ئەمەش بەپێی ڕاگەیەندراوێکی ئەو دوو وڵاتەی کە نێوەندگیری دانوستانەکان دەکەن کە بریتین لە قەتەر و پاکستان.
ڕۆژی دووشەممەش ویلایەتە یەکگرتووەکانی ئەمریکا هەڵپەساردنی سزاکانی سەر نەوتی ئێرانی بۆ ماوەی دوو مانگ ڕاگەیاند، ئەمەش دوای ئەوەی ئێران ڕەزامەندیی دەربڕی لەسەر بانگهێشتکردنی پشکنەرانی ئاژانسی نێودەوڵەتیی وزەی ئەتۆم، کە بەدوای دانوستانەکانی سویسرادا هات.
بڕیاریشە تاران شێوازێک لە کەمکردنەوەی سزاکانی واشنتن بەدەستبهێنێت، لەپاڵ ئازادکردنی سەرمایە و سامانەکانی.
قالیباف لە گرتە ڤیدیۆییەکەدا زیاتر گوتی: "بێگومان، ئێمە پێمان وایە کە هێشتا لە سەرەتای ئەم کارەداین، و پێویستە بەردەوام بین لە هەوڵەکانمان".
میدیا فەرمییەکانی ئێران ئەوەشیان بڵاوکردەوە کە قالیباف لە وڵاتی عومان وەستاوە، کە هاوبەشە لەگەڵ ئێران لە گەرووی هورمز.
ئەو ڕێڕەوە ئاوییە گرنگەی کە ئێران لە سەرەتای جەنگەکەدا دایخست، هەفتەی ڕابردوو و دوای ئەوەی واشنتن و تاران گەیشتنە ڕێککەوتن، دووبارە کرایەوە.
بەڵام تاران ڕۆژی شەممە ڕایگەیاند کە وەک کاردانەوەیەک بەرامبەر بە هێرشەکانی ئیسرائیل بۆ سەر لوبنان، گەرووەکەی دووبارە داخستووەتەوە.
بەپێی ئەو پلاتفۆرمانەی کە گرنگی بە چاودێریکردنی جووڵەی دەریاوانی دەدەن، کەشتییەکان دوێنێ بەردەوام بوون لە تێپەڕبوون بە گەرووی هورمزدا، ئەویش بە خێراییەکی زیاتر لەوەی کە پێش ڕاگەیاندنی لێکتێگەیشتنی نێوان ئەمریکا و ئێران هەبوو.