سەرباری بوونی ڕێککەوتنی ئاگربەست لە نێوان لوبنان و ئیسرائیل، ئاڵۆزییە مەیدانییەکان لە باشووری لوبنان درێژەیان هەیە. میدیاکان بڵاویان کردەوە کە ئەمڕۆ سوپای ئیسرائیل لە ڕێگەی خستنەخوارەوەی بڵاوکراوە لە ئاسمانەوە، هۆشداری داوەتە دانیشتووانی شارۆچکەی مەنسووری لە باشووری لوبنان و داوای لێکردوون بەپەلە ناوچەکەیان چۆڵ بکەن.
ئاوێنە: لەم بارەیەوە، بەرپرسێکی باڵای سەربازیی لوبنان لە لێدوانێکدا بۆ دەزگاکانی ڕاگەیاندن پشتڕاستی کردەوە کە فڕۆکەکانی ئیسرائیل ئەو نامانەیان بۆ چۆڵکردنی ناوچەکە خستووەتە خوارەوە. هەروەها ئاماژەی بەوەش کرد کە هێزەکانی ئیسرائیل لە دیوی باکوورەوە کۆنترۆڵی ناوچەکەیان کردووە و تەقە لە هەر کەسێک دەکەن کە بیەوێت لەو سنوورە نزیک ببێتەوە.
ئەو بەرپرسە سەربازییەی لوبنان ڕوونیشی کردەوە، هەرچەندە جووتیاران هێشتا بۆ ڕاپەڕاندنی کارەکانیان هاتوچۆی ناو شارۆچکەی مەنسووری دەکەن، بەڵام بەهۆی مەترسییەکانەوە چیتر لەوێ نیشتەجێ نین و ناوچەکەیان وەک شوێنی مانەوە جێهێشتووە.
لە لایەکی دیکەوە و هاوکات لەگەڵ ئەم پێشهاتانە، ئاژانسی هەواڵی نیشتمانیی لوبنان بڵاوی کردەوە کە سەرلەبەیانی ئەمڕۆ هەینی، فڕۆکە جەنگییەکانی ئیسرائیل دوو هێرشی ئاسمانیی نوێیان ئەنجامداوە و تێیدا چەند ناوچەیەکی جیاوازیان لە باشووری لوبنان کردووەتە ئامانج.
ئەم پێشهاتە مەیدانییانە و درێژەکێشانی ئاڵۆزییەکان لە کاتێکدایە، کە پێشتر دۆناڵد ترەمپ ڕایگەیاندبوو چیتر ئیسرائیل و حزبوڵا هێرش ناکەنە سەر یەکتری. لە هەمان کاتیشدا، کۆماری ئیسلامیی ئێران ڕاگرتنی یەکجاریی هێرشەکانی ئیسرائیلی وەک مەرجێکی سەرەکی بۆ ئەنجامدانی هەر جۆرە دانوستانێک لەگەڵ ویلایەتە یەکگرتووەکانی ئەمریکا دیاری کردووە.