لە دوای بەڕێوەچوونی چوار رۆژ گفتوگۆی چڕ و بەردەوام لە شاری واشنتن، هەریەک لە حکومەتەکانی ئیسرائیل و لوبنان لەسەر کێشە و دۆسیە ئەمنییەکانی نێوانیان گەیشتنە رێککەوتن. پێشبینیش دەکرێت لە چەند کاتژمێری ئایندەدا تەواوی وردەکارییەکانی پەیوەست بەم رێککەوتنە بۆ رای گشتی ئاشکرا بکرێت.
ئاوێنە: لەم بارەیەوە، پێگەی "ئەکسیۆس"ـی ئەمریکی بە پشتبەستن بە لێدوانی بەرپرسێکی باڵای ئیسرائیل ئاماژەی بەوە کردووە، رێککەوتنێکی چوارچێوەیی لەنێوان تەلئەڤیڤ و بەیروتدا هاتۆتە ئاراوە. ئەو بەرپرسە جەختی لەوەش کردۆتەوە کە سەرجەم رێکار و ئامادەکارییەکان کۆتاییان هاتووە، بۆ ئەوەی هەر ئەمڕۆ بەیاننامە و پەیامی فەرمیی هەردوو حکومەت سەبارەت بە پرسەکە بڵاوبکرێتەوە.
جێی باسە، ئەم زنجیرە دانوستانانەی نێوان هەردوو وڵات لە رۆژی سێشەممەی رابردووەوە بە چاودێری و نێوەندگیریی راستەوخۆی ویلایەتە یەکگرتووەکانی ئەمریکا دەستیپێکردووە و بۆ ماوەی چوار رۆژ بەردەوام بووە. چاودێرانی سیاسیش ئەم هەنگاوە بە وەرچەرخانێکی گرنگ دەزانن بە ئاراستەی کەمکردنەوەی گرژی و ئاڵۆزییەکانی نێوان هەردوو لا و دۆزینەوەی دەرچەیەک بۆ چارەسەرێکی سیاسی لە ناوچەکەدا.