سوپای ئیسرائیل ڕایگەیاند، لە ئاکامی ئۆپەراسیۆنێکی سەربازی لە ناوچەی باشووری سووریا، چەند چەکدارێک کوژراون.
ئاوێنە: بەپێی ڕاگەیەندراوێکی سوپای ئیسرائیل، هێزەکانیان ئۆپەراسیۆنێکی ئاسمانی و زەمینییان لەو ناوچەیە ئەنجام داوە کە بە "پشتێنەی ئەمنی" ناسراوە. ئامانجی سەرەکیی ئەم هەڵمەتە وەک لە ڕاگەیەندراوەکەدا هاتووە، "کەمکردنەوە و نەهێشتنی ئەو هەڕەشە ئەمنییانەیە" کە لەو ناوچەیەوە ڕووبەڕووی هاووڵاتییانی مەدەنی و هێزە سەربازییەکانی ئیسرائیل دەبنەوە.
لە بەشێکی تری ڕاگەیەندراوەکەدا، سوپای ئیسرائیل هۆشداری داوە کە ئۆپەراسیۆنەکانیان لە ناوچەکە بە مەبەستی پاراستنی ئاسایشی سنوورەکانیان بەردەوام دەبێت. هەرچەندە ئۆپەراسیۆنەکە ئەنجامدراوە، بەڵام تا ئێستا سوپای ئیسرائیل هیچ زانیارییەکی لەبارەی ژمارە و ناسنامەی ئەو کەسانەی کوژراون یان سەر بە چ گرووپێکی چەکدارین، ئاشکرا نەکردووە.
جێگای ئاماژەیە، ئەم پێشهاتە لە کاتێکدایە کە دوای گۆڕانکارییە سیاسی و ئەمنییەکانی سووریا و ڕووخانی ڕژێمی پێشوو، هێزەکانی ئیسرائیل لە بەشێک لە ناوچەکانی باشووری ئەو وڵاتە جێگیر بوون و ناو بە ناو ئۆپەراسیۆنی سەربازی دژی گرووپە چەکدارەکان لەو ناوچانە ئەنجام دەدەن.