سەرۆکی ئەمریکا ئاماژە بەوە دەکات کە دەتوانن لە رێوڕەسمی بەخاکسپاردنی عەلی خامنەیی رێبەری کۆچکردووی ئێران بە "یەک تەقە" هەموو بەرپرسەکان بکوژێت، بەڵام ئەو دەڵێت "ئەگەر وابکەین کەس نابێت دانوستانمان لەگەڵ بکات".
ئاوێنە: دۆناڵد ترەمپ، سەرۆکی ئەمریکا لە گفتوگۆیەکدا لەگەڵ پێگەی "ئاکسیۆس" ئاماژەی بە ئامادەبوونی سەرکردە و بەرپرسانی ئێران لە ڕێوڕەسمی بەخاکسپاردنی عەلی خامنەیی کرد و وتی "هەموویان لەوێن. تەنیا یەک تەقە بەسە بۆ ئەوەی هەموویان لەناو ببەین، بەڵام ئێمە ئەو کارە ناکەین، چونکە ئەوکاتە کەس نامێنێتەوە بۆ ئەوەی دانوستانی لەگەڵدا بکەین".
وتیشی "گفتوگۆکانی نێوان ئێران و ئەمریکا بەشێوەیەکی کاتی ڕاگیراون تاوەکو ڕێوڕەسمەکانی پەیوەست بە بەخاکسپاردنی عەلی خامنەیی کۆتاییان دێت".
ناوبراو باس لەوەدەکات، ئێران هەوڵدەدات بگاتە ڕێککەوتن و لە ئێستادا هەردوولا ئاگربەستیان پاراستووە.
بە وتەی ترەمپ "ئەم وەستانەی دانوستانەکان کاتییە و دوای تەواوبوونی ڕێوڕەسمەکە، پڕۆسەی گفتوگۆکان دەست پێ دەکەنەوە. هەروەها جەختی لەوە کردەوە کە هەر جۆرە کارێکی سەربازی لە بارودۆخی ئێستادا، دەکرێت لێکەوتەی بەرفراوانی هەبێت".
لە بەشێکی تری ئەم گفتوگۆیەدا، ترەمپ باسی لە ئەگەری دیداری لەگەڵ بنیامین ناتانیاهۆ، سەرۆکوەزیرانی ئیسرائیل کرد لە کۆشکی سپی و وتی "ڕەنگە ئەم دیدارە هەفتەی داهاتوو و دوای گەڕانەوەی لە لوتکەی ناتۆ لە تورکیا ئەنجام بدرێت".