کەمێک پێش ئێستا، ناوەڕاستی شاری دیمەشقی پایتەختی سوریا بە دوو تەقینەوەی بەهێز هەژا، کە گومانی ئەوە دەکرێت ئامانج لێی تێکدانی ڕەوشی ئەمنی ئەو ناوچەیە بووبێت کە "ئیمانوێل ماکرۆن" سەرۆکی فەرەنسا و شاندە یاوەرەکەی لێ دەمانەوە.
ئاوێنە: بەپێی ئەو زانیارییانەی لە سەرچاوە ئەمنییەکانەوە دەستکەوتوون، تەقینەوەکان لە نزیک باڵەخانەی وەزارەتی گەشتوگوزار و لە نزیک ئەو هۆتێلەی سەرۆکی فەرەنسای لێ بووە ڕوویانداوە، بە جۆرێک ستوونی دووکەڵی چڕ لە شوێنی ڕووداوەکە بەرزبووەتەوە.
سەرچاوەکان ئاشکرایان کردووە، ئەمانجێکی دیاریکراوی ئەم تەقینەوانە بەدوور نەبووە لە تیمی پاراستنی سەرۆکی فەرەنسا، بەڵام بەخت یاوەری ماکرۆن بووە، چونکە تەنیا ١٥ خولەک بەر لە ڕوودانی تەقینەوەکان، ناوبراو لەگەڵ شاندەکەی شوێنی حەوانەوەکەیان بەجێهێشتووە و بەمەش لە مەترسییەکی گەورە ڕزگاریان بووە.
لە ڕووی تەکنیکییەوە، سەرچاوە ئەمنییەکان ئاماژەیان بەوە کردووە کە تەقینەوەکان لە ڕێگەی دوو بۆمبی چێندراوەوە ئەنجامدراون؛ یەکێکیان لەناو پاسێکدا و ئەوی دیکەیان لە ئۆتۆمبێلێکی مەدەنی جێگیرکرابوون. لە ئەنجامی ئەو کردەوە تیرۆریستییەش، ئۆتۆمبێلێک بە تەواوەتی سوتاوە و ژمارەیەک کارمەندی پۆلیسی مەدەنی ناوچەکەش بریندار بوون.
تا ئێستا لایەنی بەرپرس لەم تەقینەوانە ڕانەگەیەندراوە، بەڵام تیمەکانی فریاگوزاری و هێزە ئەمنییەکان گەیشتوونەتە شوێنی ڕووداوەکە و گەمارۆی ناوچەکەیان داوە.