لە کاتێکدا ئەمریکا شەپۆلی نوێی هێرشەکانی بۆ سەر ئێران چڕتر کردووەتەوە، میدیاکانی ئیسرائیل بڵاویانکردەوە کە تەلئەبیب لە دۆخی ئامادەباشیی تەواودایە، ئەمەش لە ترسی ئەوەی شەڕەکە بەرفراوان بێت و ئیسرائیل ببێتە ئامانجی کاردانەوەی ئێران یان گرووپە چەکدارەکانی لوبنان.
ئاوێنە: دوای ئەوەی پێگەی "والا"ی ئیسرائیلی ئاماژەی بەوە کرد کە سوپای ئیسرائیل خۆی بۆ هەموو سیناریۆکان ئامادە کردووە، سەرچاوە ئەمنییەکان جەختیان لەوە کردەوە کە سەرجەم سیستمەکانی بەرگریی ئاسمانی لە دۆخی ئامادەیی بەرزدان بۆ ڕووبەڕووبوونەوەی هەر مەترسییەک لە ناوچەکە.
لە لایەکی دیکەوە، دۆناڵد ترمپ، سەرۆکی ئەمریکا، ڕایگەیاند کە فەرمانی بە ئەنجامدانی هێرشی نوێ کردووە و هۆشداری داوە لە "دەرئەنجامی زۆر خراپتر" ئەگەر ئێران بەردەوام بێت لە هەڕەشەکان بۆ سەر کەشتییە بازرگانییەکان لە گەرووی هورمز. لە بەرامبەردا، ئاژانسە فەرمییەکانی ئێران پشتڕاستیان کردەوە کە تەقینەوە لە چەند ناوچەیەک لە کەناراوەکانی باشووری وڵاتەکە ڕووی داوە، ئەمەش پاش ئەوەی فەرماندەیی ناوەندیی ئەمریکا (سێنتکۆم) ڕایگەیاند هێرشەکان بۆ دووەمین شەوی لەسەریەک بەردەوام دەبن.
ڕۆژنامەی "یەدیعوت ئاھرۆنۆت" ئاماژەی بەوە کردووە کە هەرچەندە ئیسرائیل خۆی بۆ ئەگەری گەڕانەوەی شەڕ ئامادە دەکات، بەڵام هەڵسەنگاندنەکان ئاماژە بەوە دەکەن کە ئەم گرژییانە ناگۆڕێن بۆ شەڕێکی گشتگیر. بە بڕوای ناوەندە ئەمنییەکانی ئیسرائیل، ئەمریکا پێیوایە ستراتیژیی ئێستا بریتییە لە کاتکوشتن تاوەکو هەڵبژاردنەکانی نێوەندی کۆنگرێس، بە ئامانجی پاراستنی نرخی نەوت و بێگرفتی لە بەرامبەر ڕووداوە جیهانییەکان.
هەرچەندە وەزیری بەرگریی ئەمریکا "پیت هیگسیت" سەردانە چاوەڕوانکراوەکەی بۆ ئیسرائیل هەڵوەشاندەوە، بەڵام پەیوەندییە ڕاستەوخۆکانی نێوان بنیامین نەتەنیاهۆ و دۆناڵد ترمپ بەردەوامە. لەم چوارچێوەیەدا، حکومەتی ئیسرائیل هەڕەشەی وەڵامێکی تووندی کردووە ئەگەر تاران بیەوێت ئیسرائیل تێوەگلێنێت، هاوکات ئاماژەی بەوە کردووە کە پێویستە کار لەسەر پرسی پیتاندنی یۆرانیۆمی ئێران بکرێت.
هەروەها، سوپای ئیسرائیل لە ڕێگەی گەڕاندنەوەی فڕۆکەکانی دابینکردنی سووتەمەنی بۆ ناوچەکە و کۆبوونەوە چڕەکانی "ئیل زامیر"ی سەرۆک ئەرکانی سوپا لەگەڵ فەرماندە ئەمنییەکان، پەیامی ئامادەیی تەواوی بۆ ئەنجامدانی ئۆپەراسیۆنی بەرگری یان هێرشبەری ناردووە.