بەڕێوەبەرایەتیی بەرگریی شارستانیی هەرێمی کوردستان رایگەیاند، پلەی گەرما لە ناوچەکانی هەرێمی کوردستان بۆ 47 تاوەکو 55 پلەی سیلیزی بەرزدەبێتەوە، بۆ خۆپاراستنیش چەند رێنماییەکی بڵاوکردوەتەوە.

ئاوێنه‌: بەڕێوبەرایەتی گشتیی بەرگری شارستانیی هەرێمی کوردستان رایگەیاند: "بەپێی پێشبینییەکان، لە رۆژانی داهاتودا پلەی گەرما بە شێوەیەکی بەرچاو بەرز دەبێتەوە بۆ 47 تاوەکو 55 پلەی سیلیزی، لەگەڵ دەرکەوتنی هەوری کەڵەکەبو کە دەبێتە هۆی کەمبونەوەی ئۆکسجین و خنکانی کەشوهەوا لە زۆربەی ناوچەکاندا".

بەرگری شارستانیی هەرێمی کوردستان ئەم رێنماییانه‌ی بۆ پاراستنی هاوڵاتیان خستونه‌تەڕو:

- چەرخ و ئەو سپرایانەی پەستانیان بەرزە و لەگەڵ گەرمادا زو گڕدەگرن لە ئۆتۆمبێلدا نەبن.

- خواردنەوە گازییەکان و هاوشێوەکانیان لە ئۆتۆمبێلدا نەبن.

- عەتر و پاتری ئامێرە ئەلیکترۆنییەکان بە گشتی لە ئۆتۆمبێلدا نەبن.

- پێویستە پەنجەرەی ئۆتۆمبێلەکەت بە بڕێکی کەم (سانتیمەترێک) بە کراوەیی بهێڵیتەوە.

- تانکی بەنزینی ئۆتۆمبێلەکەت بە تەواوی پڕ مەکە (تێبینی: لە روی زانستییەوە ئۆتۆمبێلە نوێیەکان سیستەمی سەلامەتییان هەیە، بەڵام بۆ دڵنیایی زیاتر وا باشترە).

- لە کاتەکانی ئێوارە و شەودا بەنزین لە ئۆتۆمبێلەکەت بکە.

- تاوەکو پێتدەکرێت لە کاتەکانی بەیانی و نیوەڕۆدا گەشت بە ئۆتۆمبێل مەکە.

- تایەکانی ئۆتۆمبێلەکەت لە رادەی پێویست زیاتر با (هەوا)ی مەکە، بەتایبەت لە کاتی گەشتکردندا.

- ئاگاداری دوپشک و مار بن: بەهۆی گەرمای توندەوە لە کونەکانیان دێنە دەرەوە و بۆ دۆزینەوەی شوێنی فێنک رودەکەنە کێڵگە، باخچە و ناو ماڵەکان.

- خواردنەوەی ئاو: بە شێوەیەکی بەردەوام و زۆر ئاو و شلەمەنییەکان بخۆنەوە.

- بوتڵی گاز: دڵنیابن لەوەی بتڵی گازی ماڵەوە لەژێر تیشکی راستەوخۆی خۆردا نەبێت.

- پەستانی کارەبا: ئاگاداری لۆد و پەستانی سەر پێوەری کارەبا بن؛ ساردکەرەوەکان (سپلیت و مکەیف) تەنیا لەو ژورانەدا داگیرسێنن کە خێزانەکەی لێیە، بەتایبەت لە کاتەکانی تینی گەرمادا.

- دورکەوتنەوە لە خۆر: بە هیچ شێوەیەک بە شێوەیەکی راستەوخۆ لەبەر تیشکی خۆردا مەمێننەوە، بەتایبەت لە کاژێر 10ـی بەیانی بۆ 3ـی دوای نیوەڕپ.