زیاتر لە هەفتەیەکە پەرلەمانی کوردستان کەوتوەتە پشووی هاوینەوە، بەڵام تاوەکو ئێستا دەنگۆی کاراکردنەوەی پەرلەمان نادیارە و هیچ زەنگێک لێنەدراوە، بەشی راگەیاندنی پەرلەمانی کوردستانیش دەڵێن، پەرلەمان ئامادەیە و چاوەڕێی رێککەوتنی لایەنە سیاسییەکان دەکات.
ئاوێنە: سامان ئەحمەد، بەڕێوەبەری ڕاگەیاندنی پەرلەمانی کوردستان سەبارەت بە کاراکردنەوەی پەرلەمان لەلێدوانێکدا بە ئاوێنەی وت "ئێمە لەچوارچێوەی کاری پەرلەمانیدا هەموو کاتێک ئامادەین بۆ هەر شتێک کە بگاتە دیوانی پەرلەمانی کوردستانەوە".
وتیشی "هۆڵی پەرلەمان ئەبدەیت کراوە و ئامادەیە، بەڵام ئایا شتێک بە ئێمە گەیشتبێت؛ حەتمەن رایدەگەیەنین و لە رووە یاسایی و پلاتفۆڕمەکان بۆ تەواوی خەڵکی روون دەکەینەوە".
ئەو دووپاتیکردەوە کە کاراکردنەوەی پەرلەمان پەیوەندی بە فراکسیۆنەکانەوەیە لە دەرەوەی پەرلەمان بگەنە رێککەوتن.
سامان ئەحمەد ئاماژەی بەوەشدا، کە پەرلەمان ئامادەکاری ناوێت، هەر شتێک بە فەرمی بگات بە ئەوان رایدەگەیەنن.
"پەرلەمان چاوەڕێی رێککەوتنی لایەنە سیاسییەکان دەکات و هەرکاتێک لایەنە سیاسیەکان بەفەرمی پەرلەمانیان ئاگادار کردەوە جەختیدەکەینەوە کە هۆڵی پەرلەمان ئامادەیە". بەڕێوەبەری ڕاگەیاندنی پەرلەمانی کوردستان وای وت