نوسینگه‌ی مه‌سرور بارزانی، سه‌رۆكی حكومه‌تی هه‌رێم رایگه‌یاند، له‌ماوه‌ی رابردودا لە چوارچێوەی هەڵمەتی ڕوبەڕوبونەوەی گەندەڵی و پاراستنی سامانی گشتیدا، له هه‌رێمی كوردستان توانرا ژماره‌یه‌ك گەندەڵکار دەستگیربکرێن و بڕێکی زۆری پارە و زێڕو موڵک و سامان بگەڕێنرێتەوە بۆ گەنجینەی گشتی. ده‌شڵێت، لەدوایین کردەوەدا، لایەنە پەیوەندیدارەکانی حکومەتی هەرێمی کوردستان، بڕی 358 کیلۆگرام زێڕی دەستبەسەرداگیراویان، ڕادەستی دەستەی دەستپاکی عێراقی فیدراڵ کرد.
ئاوێنه: نوسینگه‌ی مه‌سرور بارزانی، سه‌رۆكی حكومه‌تی هه‌رێم، ئێواره‌ی ئه‌مڕۆ دوشه‌ممه، له راگه‌یه‌ندراوێكدا وتی، لەچوارچێوەی ئەو هاریکاری و هاوئاهەنگییە بەهێز و بەردەوامەی لەنێوان عەلی زەیدی، سەرۆک وەزیرانی فیدراڵ و مەسرور بارزانی، سەرۆکی حکومەتی هەرێمی کوردستان و لایەنە پەیوەندیدار و دامودەزگاکانی حکومەتی هەرێمی کوردستان و حکومەتی فیدراڵدا هەیە، سەرۆکی حکومەتی هەرێمی کوردستان، وەزارەتی ناوخۆ و دامەزراوەکانی ئەنجومەنی ئاسایشی هەرێمی کوردستانی ڕاسپارد تاکو لەگەڵ لایەنە پەیوەندیدارەکانی حکومەتی فیدراڵ پێکەوە بۆ ڕوبەڕوبونەوەی گەنده‌ڵیی و لێپیچینەوە لە گەندەڵکاران کاربکەن.
ئه‌وه‌شی خستۆته‌ڕو، لەماوەی ڕابردوشدا، لە ئەنجامی ئەو هاریکارییەی نێوان هەردولا، لە چوارچێوەی هەڵمەتی ڕوبەڕوبونەوەی گەندەڵی و پاراستنی سامانی گشتی، توانرا ڕيکاری پێویست بەرانبەر گەندەڵکاران بگیرێتەبەرو دەستگیربکرێن و بڕێکی زۆری پارە و زێڕو موڵک و سامان بگەڕێنرێتەوە بۆ گەنجینەی گشتی.
ئاشكراشیكردوه، لەم چوارچێوەیەداو لەدوایین کردەوەدا، لایەنە پەیوەندیدارەکانی حکومەتی هەرێمی کوردستان، بڕی 358 کیلۆگرام زێڕی دەستبەسەرداگیراویان، ڕادەستی دەستەی دەستپاکی عێراقی فیدراڵ کرد.
جه‌ختیشی كردۆته‌وه كه حکومەتی هەرێمی کوردستان، بەردەوام دەبێت لە دريژەدان بە هاریکاریی و هاوئاهەنگیی لەگەڵ حکومەتی فیدراڵ بۆ ڕوبەڕوبونەوەی گەندەڵکاران و سنوردانان بۆ بەهەدەردانی سامانی گشتیی و برەودان بە دەستپاکی و سەروەری یاسا.