ئەمینداری گشتی جوڵانەوەی 'کەفا' رایگەیاند، لە هەڵمەتێکی دژە گەندەڵیدا فەرمانی دەستگیرکردن بۆ 76 پەرلەمانتار و 23 وەزیر دەردەچێت.
ئاوێنە: ڕەحیم دەراجی، ئەمینداری گشتیی جووڵانەوەی "کەفا" و پەرلەمانتاری پێشووی عێراق لە چاوپێکەوتێکی تەلەڤزیۆنیدا لەگەڵ کەناڵی "سامەڕا" وتی "لە قۆناغی یەکەمی پرۆسەی ڕاوەدوونانی گەندەڵکاراندا، لیستێک ئامادە کراوە کە ناوی 76 پەرلەمانتار و 23 وەزیری کابینە جیاوازەکانی حکومەتی عێراقی تێدایە و بڕیارە لە ڕۆژانی داهاتوودا دەستگیر بکرێن".
دەراجی باسی لەوەشکرد، ئەمە تەنیا پرسێکی ناوخۆیی نییە، بەڵکو فشارە نێودەوڵەتییەکان لەسەر حکومەتی عێراق لەبارەی گەندەڵی و پەیوەندیی بەرپرسان بە گرووپە چەکدارەکانەوە زیادی کردووە.
دەراجی نهێنیەک ئاشکرا دەکات و دەڵێت "سێ وەزیری ئێستای حکومەتی عێراق کە بڕیاربوو لەگەڵ شاندەکەی عەلی زەیدی، سەرۆکوەزیرانی عێراق سەردانی ئەمریکا بکەن، لەلایەن واشنتنەوە ڤیزایان پێ نەدراوە".
جێی ئاماژەیە، هۆکاری ڕێگریکردنی ئەمریکا لە پێدانی ڤیزا بەو سێ وەزیرە، بۆ پەیوەندییان بەو لایەنانەوە دەگەڕێتەوە کە خاوەنی گرووپی چەکدارین.