دادگایەکی تورکیا بڕیارێکی بۆ دەستگیرکردنی سەرۆکوەزیرانی ئیسرائیل دەرکرد، ئەمەش بەهۆی تۆمەتبارکردنی بەتاوانی دژی مرۆڤایەتی لەکاتی رێگریکردن لە کاروانی هاوکاریی دەریایی (سمود) بۆ کەرتی غەززە.

ئاوێنە: دادگای 11ی سزای قورس لە ئیستەنبوڵ، لەچوارچێوەی دۆسیەی دادگاییکردنی بەردەوامی رێگریی سوپای ئیسرائیل لەکاروانی دەریایی (سمود) بڕیارێکی نێودەوڵەتی بۆ دەستگیرکردنی بنیامین نەتەنیاهۆ، سەرۆکوەزیرانی ئیسرائیل دەرکرد.

دادگاکەی ئیستەنبووڵ چەندین تۆمەتی قورسی رووبەڕووی نەتەنیاهۆ و چەند بەرپرسێکی باڵای دیکەی ئیسرائیل کردووەتەوە کە بریتین لە "تاوان دژی مرۆڤایەتی، جینۆساید، بریندارکردنی بەئەنقەست، ئەشکەنجەدان، تاڵانکردن، رێگری و بێبەشکردنی هاووڵاتیان لە ئازادییەکانیان".

ئەم رێکارە یاساییانە دوای ئەوە دێن کەلە تشرینی دووەمی 2025 دا، دادگایەکی ئیستەنبوڵ بڕیاری سەرەتایی بۆ دەستگیرکردنی نەتەنیاهۆ و چەندین بەرپرسی دیکە دەرکردبوو، دواتر لە نیسانی 2026 دا، سەرۆکایەتیی داواکاری گشتیی ئیستەنبوڵ داوای سزای زیندانیی هەتاهەتایی تووندی بۆ سەرکردایەتیی ئیسرائیل کرد.