لەکاتێکدا ئاسۆکانی ململانێی نێوان تاران و پایتەختەکانی ڕۆژئاوا بەرەو دۆخێکی نادیار و ئاڵۆزتر هەنگاو دەنێن، پارتی ژیانی ئازادی کوردستان (پژاک) هەڵسەنگاندنێکی نوێ بۆ هاوکێشەکان دەکات. ڕێوار ئاودانان، وتەبێژی فەرمی پژاک، پەیوەندییەکانی ئێستای نێوان ئێران و ئەمریکا و ڕێککەوتنە ژێرپەردەکانیان بە «لەرزۆک و کاتی» پێناسە دەکات.
ئاوێنە: ڕێوار ئاودانان ئاماژە بە گۆڕانکارییە گرنگەکانی ئەوروپا دەکات و دەڵێت: "ناساندنی سوپای پاسداران وەک ڕێکخراوێکی تیرۆریستی لەلایەن بەریتانیاوە و کۆبوونەوەکانی ئەمدواییەی ناتۆ، بەڵگەی ئەوەن کە ئەوروپا سیاسەتەکانی خۆی لەگەڵ واشنتن هاوتەریب کردووە. ئامانجی کۆتایی ئەم فشارانەش، ناچارکردنی ئێرانە بە قبوڵکردنی نەزمێکی نوێی هەرێمی بە هەژموونی ئیسرائیلەوە، یانیش ڕووبەڕووبوونەوەی شەڕێکی یەکلاکەرەوە، کە پێدەچێت بژاردەی شەڕ لە ئێستادا بەهێزتر بێت."
گەرووی هورمز و بابولمەندەب؛ چۆکی جیۆپۆلەتیکی ئێران
وتەبێژی پژاک پەردە لەسەر لایەنە ئابوری و وزەییەکانی ئەم ململانێیە لادەدات و ڕوونیدەکاتەوە کە ئیسرائیل لە ڕێگەی پڕۆژەی «پەیمانی ئیبراهیمی» دەیەوێت هێڵێکی نوێی وزە بکێشێت کە بە تەواوی پێگەی جیۆپۆلەتیکی ئێران و بەتایبەت کۆنترۆڵی گەرووی هورمز پەکبخات.
ئەم گۆڕانکارییانە تەنها لە ناوچەکەدا قەتیس نابن، بەڵکو کاریگەریی جیهانییان دەبێت:
ئەگەری پاشەکشەی ئێران: ئەگەر ئێران لە گەرووی هورمز و هێڵی قەوقاز پاشەکشە بکات، پڕۆژە ستراتیژییەکانی چین و پێگەی ڕووسیا تووشی شۆک و تەنگژەی گەورە دەبن.
گۆڕانی پێگەی تورکیا: ئەم دۆخە ئەنقەرە ناچاردەکات هاوسەنگییەکان بگۆڕێت و خۆی وەک نەیارێکی سەرسەختی تاران و مۆسکۆ نیشان بداتەوە.
سیناریۆی داخستنی گەرووەکان: لە بەرامبەر ئەم گەمارۆدانەدا، ئەگەری هەیە تاران لە ڕێگەی حوسییەکانی یەمەنەوە گەرووی بابولمەندەب دابخات؛ هەنگاوێک کە هاوشانی گەرووی هورمز، ئابووری جیهان دەباتە سەر لێواری کارەساتێکی پێشبینینەکراو.
پەیامێک بۆ ئۆپۆزسیۆن: «پشت بە هێزی سێیەم ببەستن»
پژاک بە توندی ڕەخنە لەو هێڵە سیاسییە دەگرێت کە چاویان لە گۆڕانکاریی دەرەکییە. وتەبێژی پارتەکە جەختدەکاتەوە کە «نە سازش و نە شەڕ» ناتوانن قەیرانەکانی ئێران چارەسەر بکەن، چونکە لە دانوستانە دەرەکییەکاندا پرسی دیموکراسی و مافی گەلان فەرامۆش کراوە و تەنها هەوڵ بۆ مانەوەی ڕژێم دەدرێت.
ئاودانان پەیامێکی ئاراستەی ئۆپۆزسیۆنی دەرەوەی وڵات کرد و گوتی:
"داوا لە هێزە دیموکراتیخوازەکانی ئێران دەکەین ستراتیژی خۆیان بەپێی ناکۆکی یان سازشی نێوان ڕژێم و زلهێزەکان دانەنێن. پێویستە پشت بە «هێزی سێیەم» ببەستن کە کۆمەڵگەیە. دەبێت لە ڕێگەی ڕێکخستنی تۆڕە مەدەنییەکان، ژنان، و گەنجان و بە سوودوەرگرتن لە ئەزموونەکانی شۆڕشی «ژن، ژیان، ئازادی»، تەمەنی کۆماری ئیسلامی کورت بکرێتەوە."
کێشەی کورد و مافی بێ ئەملاولای «بەرگریی ڕەوا»
لە بارەی دۆخی ناوخۆیی و ڕۆڵی کورد لەم هاوکێشەیەدا، ڕێوار ئاودانان ئاشکرایکرد کە گەلی کورد بە هۆشیارییەوە خۆی لە سووتانی نێو ئاگری شەڕی ئەمریکا و ئێران پاراستووە، چونکە ئەم ململانێیانە هیچ گەرەنتییەک بۆ مافەکانی ئەوان دەستەبەر ناکەن. ئەو جەختیشی کردەوە کە پێکدادانەکانی ئەم دواییەی نێوان سوپای پاسداران و هێزە کوردییەکان، دەرەنجامی هێرش و لەشکرکێشییە یەکلایەنەکانی خودی کۆماری ئیسلامی بووە بۆ سەر خاکی کوردستان.
وتەبێژی پژاک لێدوانەکەی بە جەختکردنەوە لەسەر بژاردەکانی خەبات کۆتایی پێهێنا و ڕایگەیاند: "هەرچەندە لەم سەردەمەدا ئازادیی ڕاستەقینە لە ڕێگەی سیاسەتی دیموکراتیکەوە بەدەستدێت و سەردەمی شەڕی چەکداری کۆتایی هاتووە، بەڵام لە کاتێکدا کە کۆماری ئیسلامی هیچ ژینگەیەکی کراوە و دەرفەتێکی گفتوگۆ ناهێڵێتەوە، «بەرگریی ڕەوا» دەبێتە مافێکی بنەڕەتی، سروشتی و بێ ئەملاولای گەلی کورد و سەرجەم پێکهاتە چەوساوەکانی ئێران."