ئا: ئاوێنە
هاوسەرۆکی پژاک جەخت لەسەر ئەوە دەکاتەوە کە ئێران لە ترسی هێزە ناوخۆیییەکان پەنا بۆ هەڕەشە و توندوتیژی دەبات، داواش لە تورکیا دەکات بۆ پاراستنی خۆی خاوەنداری لە پرۆسەی ئاشتیی ڕێبەر ئاپۆ بکات.
پەیمان ڤیان، هاوسەرۆکی گشتیی پارتی ژیانی ئازادیی کوردستان (پژاک)، لە چاوپێکەوتنێکی فراواندا لەگەڵ ئاژانسی "ژن نیوز"، تیشکی خستە سەر دۆخی سیاسی و ئەمنیی ڕۆژهەڵاتی کوردستان و ئێران و ئەو گۆڕانکارییە خێرا و ئاڵۆزانەی لە ڕۆژهەڵاتی ناوەڕاستدا ڕوودەدەن.
"جەنگی سێیەمی جیهانی و دیزاینکردنەوەی ڕۆژهەڵاتی ناوەڕاست"
پەیمان ڤیان جەنگی نێوان ئێران و ئیسرائیل-ئەمریکای بەشێک لە "جەنگی سێیەمی جیهانی" وەسف کرد کە ڕێبەر ئاپۆ پێشبینی کردبوو. ناوبراو ئاماژەی بەوە کرد کە ئەم شەڕانە بە تەنیا ململانێی دوو وڵات نین، بەڵکو پەیوەندییان بە هەموو جیهانەوە هەیە. ڤیان وتی: "هێزە باڵادەستەکان بۆ جێبەجێکردنی پڕۆژەی نوێ و دیزاینکردنەوەی ڕۆژهەڵاتی ناوەڕاست، ئێرانیان کردووەتە ئامانج. لە لوتکەی ناتۆدا، دۆخی ڕۆژهەڵاتی ناوەڕاست و جەنگی ئێران بوونەتە تەوەری سەرەکیی ڕۆژەڤ، ئەمەش ئاماژەیە بۆ ئەوەی ناوچەکە خۆی بۆ قۆناغێکی نوێی جەنگ ئامادە دەکات."
"ڕژێمی ئێران لە ناوخۆدا تووشی قەیران بووە"
سەبارەت بە دۆخی ناوخۆی ئێران، هاوسەرۆکی پژاک پێی وایە ڕژێم لە دۆخێکی لاوازدایە و تەنیا بۆ کاتێکی کاتی دەتوانێت بەردەوام بێت. ڤیان وتی: "ئێران لەبەر ئەوەی گەلەکەی لێی ناڕازین، لە خاڵێکی لاوازدایە. کاتێک ڕژێم لاواز دەبێت، پەنا بۆ هەڕەشە و لەسێدارەدان دەبات. هێرشەکانی ئەم دواییەی ئێران بۆ سەر ئەندامانی یەرەکە و فشارەکانی بۆ سەر ژنان و گەنجان، بەشێکن لە هەوڵدان بۆ ترساندن و ئامادەسازی بۆ ڕووبەڕووبوونەوەی قۆناغێکی نوێ." ناوبراو جەختی کردەوە کە پژاک وەک هێزی جێگرەوە (ئاڵتەرناتیڤ)، لەسەر هێڵی شۆڕشی "ژن، ژیان، ئازادی" بەرخۆدان دەکات و ڕژێم لەم بیری دیموکراتیکەی کورد دەترسێت.
"پژاک ئامادەیە بۆ پاراستنی گەل"
ڤیان ئاماژەی بەوە کرد کە پژاک ٢٢ ساڵە لە خەباتدایە و ئێستا گەیشتووەتە ئاستێکی بەهێز. ئەو وتی: "ئێمە وەک پژاک بۆ پاراستنی گەلەکەمان تێدەکۆشین. لە بەرامبەر ئەو هێزەی هەڕەشە دەکات، ئێمەش خۆمان بۆ شەڕێکی گەورە ئامادە دەکەین. ئێران ترسی سەرەکیی لە هێزە ناوخۆیییەکانە، چونکە دەزانن ئەگەر لە ناوخۆوە گورزیان بەرنەکەوێت، تەمەنیان درێژ دەبێت."
"تورکیا بەپێی بەرژەوەندییەکانی دەجووڵێتەوە"
سەبارەت بە هەڵوێستی تورکیا لە ناوچەکەدا، هاوسەرۆکی پژاک ڕایگەیاند کە تورکیا دەیەوێت ببێتە کاراکتەری سەرەکی و دۆخی ئێران وەک مەترسییەکی گەورە بۆ سەر خۆی دەبینێت، بۆیە هەوڵی دەدا ئێران بە لاوازیشەوە لەسەر پێ بمێنێتەوە. بەڵام ڤیان ئاشکرای کرد: "دوای کۆبوونەوەی لوتکەی ناتۆ لە ئەنقەرە، هەڵوێستی تورکیا گۆڕا، چونکە تورکیا بەپێی بەرژەوەندییەکانی خۆی مامەڵە دەکات. بۆ ئەوەی تورکیا خۆی لەم ئاڵۆزییانە ڕزگار بکات، پێویستە خاوەنداری لەو قۆناغە بکات کە ڕێبەر ئاپۆ دەستی پێکردووە و هەنگاو بەو ئاڕاستەیەدا بنێت."
"بانگەواز بۆ یەکێتیی نەتەوەیی"
لە کۆتایی قسەکانیدا، پەیمان ڤیان هۆشداری دا لەوەی هێزە دەرەکییەکان دەیانەوێت بە سیاسەتی پارچەپارچەکردن، کوردان لە هەر چوار بەشی کوردستان لەناو ببەن. وتیشی: "دەبێت یەکێتیی نەتەوەیی لە ڕۆژەڤماندا بێت. وەک پژاک، هەڵوێستمان لەسەر بنەمای بەهێزکردنی یەکترە و داواکارین لەم قۆناغە هەستیارەدا کوردان بە ڕۆحێکی یەکگرتوو و بە هەڵوێستێکی ڕادیکاڵ بەرامبەر بە پیلانەکان بوەستنەوە."