وەزارەتەکانی کارەبا و سامانە سروشتییەکان، ڕایانگەیاند، دۆخی کارەبا کۆنتڕۆڵ دەکرێت و قەیرانی غاز ڕوونادات.
ئاوێنە: لە ڕاگەیاندراوێکی هاوبەشی هەردوو وەزارەتی سامانە سروشتییەكان و كارەبادا هاتووە، دوای ئەوەی بەهۆی هەڕەشە ئەمنییەكانەوە كۆمپانیای داناگاز بەرهەمهێنانی گازی سرووشتیی لە كێڵگەی كۆرمۆر وەستاند، هەناردەی گاز بۆ وێستگەكانی كارەبا ڕاوەستا و بڕی 2500 مێگاوات كارەبا كەمبووەوە، بۆ دابەشكردنی ئەو بڕە كارەبایەی كە لە وێستگە جۆراوجۆرەكانی كارەبا بەرهەمدێت، وەزیری كارەبا و وەزیری سامانە سروشتییەكان بە وەکالەت، تیمێكی هاوبەشی هەردوو وەزارەتیان ڕاسپارد بۆ ئەوەی كۆنتڕۆڵی دۆخەكە بكەن و بەشێوەیەكی ڕێكوپێك ئەو بڕە كارەبایەی هەیە بەسەر پارێزگا و ئیدارە سەربەخۆكان دابەشبكرێت.
ئاماژە بەوەشدەکات، تیمێكی كۆنتڕۆڵی كارەبای هەرێمی کوردستان بەردەوام چاودێریی دۆخەكە و ڕێكخستنەوەی بەرهەمهێنان و گواستنەوەی كارەبا دەكات، بۆ دابینکردنی گازی شل و پڕكردنەوەی پێداویستیی ڕۆژانەی ماڵان.
دەشڵێت، ڕەزامەندیی وەزارەتی نەوتی فیدراڵ وەرگیراوە بۆ دابینکردنی پێداویستیی ڕۆژانەی گازی ماڵان، هەر ئەمڕۆ چەندین تەنكەری گاز ڕەوانەی شارەكانی هەرێمی كوردستان دەکرێن.
ئەوەش هاتووە، هاوڵاتییان دڵنیادەكەینەوە قەیرانی غازی ماڵان ڕوونادات و كار دەكرێت بۆ گەڕانەوەی بەرهەمهێنانی كێڵگەی كۆرمۆر بە زووترین كات.