هاووڵاتییەک کە پیشەکەی شوان بووە و دانیشتووی یەکێک لە گوندەکانی بناری قەندیلە لەلایەن هێزەکانی سەر بە سوپای پاسدارانەوە تەقەی لێکرا و بریندار کراوە، بەڕێوەبەری بەشی فریاکەوتنی قەڵادزێش بە ڕۆژنیوزی ڕاگەیاند، ئەو هاووڵاتییە شوانکارەیە لەلایەن سوپای پاسدارانی ئێرانەوە تەقەی لێکراوە و گولـلە بەر قۆڵی کەوتووە.
ئاوێنە: ئەمڕۆ، هاووڵاتییەکی دانیشتووی گوندی سپییەرۆی سەر بە شارەدێی ژاراوە لە دۆڵی لینای بناری قەندیل بووە و پیشەی شوانکارە بووە، لەلایەن هێزەکانى سەر بە سوپای پاسدارانی ئێرانەوە تەقەی لێکراوە و بریندار کراوە.
لەوبارەیەوە ڕاستی خدر، بەڕێوەبەری بەشی فریاکەوتنی قەڵادزێ ڕایگەیاند، هاووڵاتییەک بە ناوی (وسوو حەسەن)، کە دانیشتووی گوندی سپیەرۆی سەر بە شارەدێی ژاراوەیە لە دۆڵی لینای قەندیل و پیشەی شوانکارەیە، لەلایەن سوپای پاسدارانەوە تەقەی لێکراوە و برینداربووە.
ئاماژەی بەوەشکرد، هاووڵاتییەکە تەمەنی ٦٩ ساڵە و پیشەی شوانکارەیە، پاش ڕووداوەکەش بە مەبەستی وەرگرتنی چارەسەری پێویست گەیەندراوەتە فریاکەوتنی قەڵادزێ و لە ئێستادا باری تەندروستی جێگیرە.
ئەمەش لەکاتێکدایە، لە دوای شەڕ و ئاڵۆزییەکانی ئەم دوایەی ناوچەکە ئەمە دووەمین ڕووداوی تەقەکردنە، هەفتەی ڕابردووش هەر لە بناری قەندیل بە تەقەی سوپای پاسداران شوانکارەیەک گیانی لەدەستدا.