لە گۆڕانکارییەکی چاوەڕواننەکراودا، سەرۆکی ئەمریکا دۆناڵد ترەمپ بڕیارێکی دەرکرد بۆ ڕاگرتنی دەستبەجێی هێرشە ئاسمانییەکانی وڵاتەکەی بۆ سەر ئامانجەکان لە ئێران، بەمەش زنجیرەیەک هێرشی بەردەوام کە ماوەی دوو هەفتەی خایاندبوو، بە شێوەیەکی کاتی پچڕا. ئەم بڕیارە نوێیە کە لەلایەن چەند سەرچاوەیەکی ئاگادارەوە پشتڕاست کراوەتەوە، لە کاتێکدا دێت کە سوپای ئەمریکا بۆ ماوەی ١٣ ڕۆژی ڕابردوو ڕۆژانە پلانی پەسەندکراوی بۆ لێدانی پێگەکانی ئێران جێبەجێ دەکرد.
ئاوێنە: شارەزایانی سیاسی پێیان وایە هەنگاوەکەی کۆشکی سپی دوو لایەنی سەرەکی هەڵگرتووە؛ یەکێکیان ئارەزووی ڕاستەقینەیە بۆ پێشکەشکردنی دەرفەت بە پڕۆسەی دیپلۆماسی، و ئەوی تریان دانی ناچارییە بەوەی کە شێوازی ئێستای هێرشە سنووردارەکان گەیشتووەتە لوتکەی کاریگەریی سەربازیی خۆی و بێ ئەنجامدانی ئۆپەراسیۆنی فراوانتر، ناتوانێت گۆڕانکاریی ستراتیژی دروست بکات. لەگەڵ ئەوەشدا، سەرچاوە سەربازییەکان دووپاتی دەکەنەوە کە سوپای ئەمریکا لە ڕووی لۆجستییەوە لە ئامادەباشیدایە و دەتوانێت لە خێرترین کاتدا بگەڕێتەوە دۆخەی هێرشبردن ئەگەر فەرمانی نوێ دەربچێت، هەرچەندە تا ئێستا هیچ ئاماژەیەک بۆ دەستپێکردنەوەی ئۆپەراسیۆنی گەورە بوونی نییە.
هەڵوێستی سیاسی و لێدوانە فەرمییەکان
لە لێدوانێکدا بۆ ڕۆژنامەنووسان لە کۆشکی سپی، دۆناڵد ترەمپ جەختیکردەوە کە بژاردەی سەربازی هێشتا لە سەر میزە و دەسەڵاتی تەواوی هەیە بۆ توندترکردنەوەی گوشارەکان، بەڵام هاوکات ڕایگەیاند کە گەیشتن بە ڕێککەوتن لەگەڵ تاراندا بژاردەیەکی ژیرانەترە. ناوبراو ئاماژەی بەوەدا کە پەیوەندی و گفتوگۆکان لە ئارادان و لایەنی ئێرانی ڕۆژ بە ڕۆژ جددیتر دەبن لە گفتوگۆکاندا، هەرچەندە لە بۆنەیەکی تریدا و لە وتارێکیدا بۆ کۆمەڵەی ڕۆژنامەنووسانی کۆشکی سپی، ئاماژەی بەوە کرد کە پێی وا نییە تاران لە ئێستادا گەیشتبێتە قۆناغی کۆتایی بۆ واژۆکردنی ڕێککەوتن، بەڵام دەرگای بیستن و لێکتێگەیشتنی بە کراوەیی هێشتووەتەوە.
دۆخی ناوچەکە و جموجوڵی هاوپەیمانان
لەلایەکی ترەوە، گۆڕانکارییە خێراکانی واشنتن نیگەرانی و بڕیاری پێشوەختەی لە تل ئەبیب لێکەوتەوە. بەرپرسانی ئیسرائیلی ئاشکرایان کرد کە کابینەی ئاسایش و سوپای ئیسرائیل چاوەڕێی دەستپێکردنی شەپۆلێکی نوێ و بەهێزی هێرشی ئەمریکی بوون لە ڕۆژی هەینیدا، بە جۆرێک کە خۆیان بۆ ئەگەری وەڵامدانەوە و تۆڵەسەندنەوەی مووشەکی لەلایەن ئێرانەوە ئامادە کردبوو، چونکە زانیارییە پێشوەختەکان ڕوون نەبوون. بەڵام درەنگانی شەوی هەینی، لایەنی ئیسرائیلی لەلایەن هاوبەشە ئەمریکییەکەیەوە ئاگادار کرایەوە کە فەرمانی ڕاگرتنی هێرشەکان دەرچووە.
ئەم پشووە سەربازییە هاوکات بوو لەگەڵ گەیشتنی شاندێکی دیپلۆماسیی عومانی بۆ پایتەختی ئێران، بە مەبەستی پێشکەشکردنی نەخشەڕێگایەکی نوێ بۆ چارەسەرکردنی قەیرانەکە و بەدیاریکراوی کردنەوەی گەروی هورمز. زانیارییە سەرەتاییەکان لە سەرچاوە ناوچەیییەکانەوە ئاماژە بەوە دەکەن که پێشکەوتنی بەرچاو لەو گفتوگۆیانەدا هاتووەتە ئاراوە و ئەگەرچی ڕێککەوتنی کۆتایی لە نێوان عومان و ئێراندا چاوەڕوان دەکرێت لە کۆتایی ئەم هەفتەیەدا یەکبلایەنە یان بە هاوبەشی بچێتە بواری جێبەجێکردنەوە، بەڵام بڕیاری کۆتایی لەسەر پەسەندکردنی ئەم ڕێککەوتنە نێوەندگیری کراوە دەگەڕێتەوە بۆ هەڵوێست و ڕەزامەندیی سەرۆکی ئەمریکا.