حکوومەتی کوێت بە فەرمی ئەو زانیارییە ڕۆژنامەوانییانەی ڕەتکردەوە کە باس لە بەشداریی سەربازیی ئەو وڵاتە لە ئۆپەراسیۆنەکان دژی ئێراندا دەکەن و جەختی کردەوە کە ئەو بانگەشانە هیچ بنەمایەکی ڕاستییان نییە.
ئاوێنە: لە نامەیەکی فەرمیدا کە بۆ دەزگاکانی ڕاگەیندن و ڕۆژنامەنووسان نێردراوە، زەین سەباح، باڵیۆزی کوێت لە ویلایەتە یەکگرتووەکانی ئەمریکا، ڕایگەیاند کە کوێت بە هیچ شێوەیەک بەشداری لە هیچ ئۆپەراسیۆنێکی سەربازیدا دژی ئێران نەکردووە. هەروەها دووپاتیکردەوە کە وڵاتەکەی ڕێگەی نەداوە خاک، ئاسمان، یان ئاوە هەرێمییەکانی بۆ ئەنجامدانی هیچ ئۆپەراسیۆنێکی هێرشبەرانە دژی هیچ وڵاتێکی دراوسێ بەکاربهێنرێت.
باڵیۆزی کوێت ئاماژەی بەوەش کرد کە هەڵوێستی سیاسیی وڵاتەکەی هەمیشە نەگۆڕ و ڕوون بووە و لەسەر بنەمای ڕێزگرتن لە یاسای نێودەوڵەتی، پاراستنی سەروەریی دەوڵەتان، بەهێزکردنی دراوسێیەتیی باش، و چارەسەرکردنی تەواوی ململانێکان لە ڕێگەی دیالۆگ و ئامرازە دیپلۆماسییەکانەوە بنیاد نراوە.
هەروەها ئەوەی خستەڕوو کە کوێت بەپێی پێگە و ئەزموونی خۆی لەگەڵ لێکەوتەکانی قەیرانەکانی ناوچەکەدا، باوەڕی وایە ئاسایشی هەرێمی لە ڕێگەی ئاڵۆزکردنی دۆخی سەربازییەوە بەدەست نایەت، بەڵکو تەنها لە ڕێگەی کەمکردنەوەی گرژییەکان، خۆڕاگرتن و بەشداریکردن لە دیالۆگێکی دیپلۆماسیی جدی و بەردەوامەوە مسۆگەر دەبێت.
لە کۆتایی پەیامەکەیدا، باڵیۆزی کوێت داوای لە ڕۆژنامەی “وۆڵ ستریت جۆرناڵ” کرد، کە ناوەڕۆکی ئەو ڕاپۆرتە ڕاست بکاتەوە بە شێوازێک کە ڕەنگدانەوەی هەڵوێستی ڕاستەقینەی کوێت بێت، و جەختی لەوەش کردەوە کە وردبینی لە گواستنەوەی ڕووداوەکاندا، بەتایبەت لە سایەی هەستیاریی گرژییە هەرێمییەکاندا، بەرپرسیارێتییەکی پیشەییی گرنگە بۆ پاراستنی سەقامگیریی ناوچەکە.
جێی ئاماژەیە، ڕۆژی ٢٤ی ئەم مانگە، ڕۆژنامەی “وۆڵ ستریت جۆرناڵ” ڕاپۆرتێکی بڵاوکردبووەوە و تێیدا ئاماژەی بەوە کردبوو کە لە سەرەتای ئەم مانگەدا، بەحرێن و کوێت هێرشی ئاسمانیی نهێنییان کردووەتە سەر چەند شوێنێک لە ناو خاکی ئێراندا، کە ئەمەش وەک یەکەم کاردانەوەی سەربازیی ڕاستەوخۆی ئەو دوو وڵاتە بۆ سەر تاران لە سەرەتای گرژییەکانی ئەم دواییە ناو بردرابوو.