مەلایەکی عەرەب کە پێشنوێژی مزگەوت و بەڕێوەبەری خوێندنگەیەکی ئایینی بووە، بە تۆمەتی دەستدرێژی سێکسی بۆ سەر ژنان لە ویلایەتێکی ئەمریکا دەستگیرکرا.
ئاوێنە: دەسەڵاتدارانی ئەمنیی لە ناوچەی ڕیچلاندی سەر بە ویلایەتی کارۆلینای باشوور ئەمریکا تۆمەتبار لۆئەی ئەلخەتیبی تەمەن ٥٥ ساڵیان دەستگیر کرد، کە وەک ئیمامی مزگەوت و بەڕێوەبەری قوتابخانەیەکی سەر بە دامەزراوەی (Mission Hope Foundation) کاری دەکرد.
دەستگیرکردنی ناوبراو دوای لێکۆڵینەوەیەکی فراوان هات کە تێوەگلانی لە تاوانی دەستدرێژیی سێکسی و خراپبەکارھێنانی دەسەڵاتی ئایینی و کارگێڕیی دەرخست، لە ئێستاشدا تۆمەتبار بە بڕیاری دادگا دەستبەسەرە.
دەستپێکی ئاشکرابوونی تاوانەکە بۆ ٣٠ی حوزەیرانی ٢٠٢٦ دەگەڕێتەوە، کاتێک یەکێک لە قوربانییەکان سکاڵایەکی فەرمیی لای پۆلیس تۆمار کرد و تێیدا ڕایگەیاند کە بۆ ماوەی چەندین ساڵ لەلایەن تۆمەتبارەوە ڕووبەڕووی دەستدرێژیی سێکسی بووەتەوە.
دوای بەدواداچوونی زیاتری هێزە ئەمنییەکان، چوار قوربانیی دیکەش هاتنە سەر هێڵ و وتەی هاوشێوەیان پێشکەش کرد، بەمەش ژمارەی کۆی قوربانییە ئاشکراکراوەکان گەیشتە پێنج کەس.
بەپێی ڕاگەیەندراوی فەرمیی پۆلیس، لوئەی خەتیب رووبەڕووی چەندین تۆمەتی قورسی تاوانکاری بووەتەوە کە بریتیین لە تاوانێکی ڕەفتاری سێکسیی پلە یەک لەگەڵ چوار تۆمەتی ئەنجامدانی دەستدرێژی و لێدان لە پلە یەک. ڕوونیشیکردووەتەوە کە تۆمەتبار پێگەی ئایینی و پۆستەکەی وەک بەڕێوەبەری قوتابخانە قۆستووەتەوە بۆ دروستکردنی گوشار و سەپاندنی هەژموون بەسەر قوربانییەکاندا، کە سەرجەمیان لە ئیماندارانی مزگەوتەکە و کارمەندانی قوتابخانەکە بوون.
لە کۆتاییدا دەزگا ئەمنییەکان داوایان لە هەموو ئەو کەسانە کردووە کە زانیاریی زیاتریان لایە یان قوربانیی ئەگەریی دیکەن و تا ئێستا سکاڵایان تۆمار نەکردووە، بەپەلە پەیوەندی بە نووسینگەی بەرپرسی پۆلیسەوە بڕەخسێنن بۆ پێشکەشکردنی وتەکانیان و هاوکاریکردنی بەڕێوەچوونی دادپەروەرانەی لێکۆڵینەوەکان.