سوپای پاسدارانی ئێران ڕایگەیاند، کۆنترۆڵی گەروی هورمزیان لەدەستدایە و تاوەکو هەڕەشە و دەستوەردانەکانی ئەمریکا بەردەوام بێت، گەروەکە بە داخراوی دەمێنێتەوە. هەروەها هەڕەشەی وەڵامێکی "سەخت" لەو وڵاتانە دەکات کە هاوکاری ئەمریکا دەکەن و جەخت دەکاتەوە کە "دەستدرێژیکاران" هەر ئەمڕۆ سزا دەدرێن.
ئاوێنە سوپای پاسداران ئەمڕۆ پێنجشەممە لە ڕاگەیەندراوێكدا كە میدیا فەرمیەكانی ئێران بڵاویانكردوەتەوە، هەڕەشەیەکی توند ئاراستەی ئەمریکا و هاوپەیمانەکانی دەکات و ڕایدەگەیەنێت، هەر وڵاتێک هاوکاری "دەستدرێژیکاران" بکات، ڕوبەڕوی وەڵامێکی سەخت دەبێتەوە.
لە بەیاننامەکەدا هاتوە، شەوی ڕابردو بە هاندانی فڕۆکە ئەمریکییەکان، دو كەشتی نەوتهەڵگر ویستویانە لە ڕێگەیەکی نائارامی باشوری گەروی هورمزەوە تێپەڕن، بەڵام دوای ئەوەی ئاگرێکی بەهێز لە یەکێکیاندا کەوتوەتەوە، هەردو کەشتییەکە ناچار بون بە خێرایی پاشەکشە بکەن و بگەڕێنەوە.
سوپای پاسداران جەختی لەوە کردوەتەوە، "گەروی هورمز لەژێر كۆنتڕۆڵی ئەوانە و هێزی دەریایی سوپا بە تەواوی کۆنترۆڵی ناوچەکەی کردوە". لەو بارەیەوە هۆشداری دەداتە هێزە بیانییەکان و دەڵێت، "ڕێگە بە هیچ بێگانەیەک نادرێت لە دوری هەزاران کیلۆمەترەوە بێت و دەستوەردان بکات، هەر ئەمڕۆش دەستدرێژیکار سزا دەدرێت".
سەبارەت بە چارەنوسی گەروی هورمز، لە ڕاگەیەندراوەکەدا هاتوە، گەروەکە بە ڕوی کەشتیوانیدا ناکرێتەوە تاكو ئەو کاتەی "زیادەڕۆیی و هەڕەشەکانی بەرپرسانی ئەمریکا و دەستوەردانیان لە ناوچەکەدا بەردەوام بێت." سوپای پاسداران ئاماژەی بەوەشکردوە، هەر هەڕەشە و دەستوەردانێکی زیاتر، بارودۆخەکە بۆ هێزە بیانییەکان سەختتر و ئاڵۆزتر دەکات.
لە کۆتایی بەیاننامەکەدا، سوپای پاسداران ڕوی پەیامەکەی کردوەتە ئەو وڵاتانەی هاوکاری ئەمریکا دەکەن و هۆشداری توندی پێداون، كە ئەگەر ڕەفتارەکانیان چاک نەکەن، دەبێت چاوەڕوانی وەڵامێکی توند و سەخت بن.
ڕاگەیەندراوەكەی سوپای پاسداران لەكاتێكدایە کە ڕوبەڕوبونەوەی سەربازیی نێوان ئەمریکا و ئێران ڕوی لە هەڵکشان کردوە و مەودای گورز و هێرشە بەرامبەرەکان لە ناوچەکەدا فراوان بوە. بەرەبەیانی ئەمڕۆش سوپای ئەمریكا هێرشێكی دو كاتژمێری كردە سەر ئێران و دەڵێت، "دەیان شوێنی سەر بە سوپای پاسدارانیان لە ناوخۆی ئێران کردوەتە ئامانج".