میدیا عەرەبییەکان بڵاویانکردەوە، حکومەتەکانی سوریا و ئوردن هۆشدارییەکی توندیان ئاراستەی عێراق کردوە کە هەر هێرشێک لەلایەن گروپە چەكدارەكانی لایەنگری ئێرانەوە ئەنجام بدرێت، بە توندی وەڵام دەدەنەوە.
ئاوێنە: کەناڵی "العربية/الحدث" لەزاری بەرپرسێکی عێراقی بڵاویکردووەتەوە، سوریا بە عێراقی ڕاگەیاندووە؛ جوڵەی گروپە چەكدارەكانی لایەنگری ئێرانی لە نزیک هێڵێ سنوری نێوان هەردوو وڵات بەدی کردووە، و هۆشداریداوە کە هەر هێرشێک لە خاکی عێراقەوە دەستپێبکات، وەڵامی دەدەنەوە.
هاوکات بەپێی سەرچاوەکان بۆ ئەو میدیایانە، لایەنی سوری ڕاستەوخۆ پەیوەندی بە بەرپرسانی عێراقییەوە کردووە بۆ گواستنەوەی هۆشدارییەکان، و داوای گرتنەبەری ڕێوشوێنی کردووە بۆ ڕێگری لە بەکارهێنانی خاکی عێراق لە جێبەجێکردنی هەر ئۆپەراسیۆنێک کە سوریا بکاتە ئامانج.
ئەوەش لەکاتێکدایە، هێزە چەکدارەکانی ئوردن، ڕۆژی پێنجشەممە، پوچەڵکردنەوەی هەوڵێکیان بۆ بەئامانجگرتنی وڵاتەکە بە پێنج موشەک کەلە ئێرانەوە ئاراستە کرابون ڕاگەیاند.