وه‌زاره‌تی دارایی و ئابوریی هه‌رێم رایگه‌یاند، ده‌ستیان به ئاماده‌كاری كردوه بۆ بودجه‌ی ساڵی 2027ی عێراق و ئه‌مڕۆش له كۆبونه‌وه‌یه‌كدا له وه‌زاره‌ته‌كه‌یان به ئاماده‌بونی وه‌زیرانی پلاندانان و کارەبا و سکرتێری ئەنجومەنی وەزیران و سەرۆکی فەرمانگەی هەماهەنگی و بەدواداچون، بەوردی گفتوگۆ كراوه لە بارەی ماف و شایستە داراییەکانی هەرێمی کوردستان.
ئاوێنه: وه‌زاره‌ته‌كه، له راگه‌یه‌ندراوێكدا وتویه‌تی، لەسەر ڕاسپاردەی ئەنجومەنی وەزیران و بەمەبەستی ئامادەکاری بۆ ماف و شایستە داراییەکانی هەرێمی کوردستان لە پرۆژە یاسای بوودجەی ساڵی 2027ی حکومەتی فیدراڵی عێراق، ئه‌مڕۆ یەکشەممە، بەسەرپەرشتی ئاوات شێخ جەناب، وەزیری دارایی و ئامادەبونی دكتۆر دارا ڕەشید، وەزیری پلاندانان و کەمال محەمەد، وەزیری کارەبا و دکتۆر ئامانج ڕەحیم، سکرتێری ئەنجومەنی وەزیران و دکتۆر عەبدولحەکیم خەسرۆ، سەرۆکی فەرمانگەی هەماهەنگی و بەدواداچون و ژمارەیەک لە ڕاوێژکار و بەڕێوەبەرە گشتییەکان، کۆبونەوەیەک لە وەزارەتی دارایی و ئابوری بەڕێوەچو.
ئه‌وه‌شی خستۆته‌ڕو، "لە کۆبوونەوەکەدا بەوردی گفتوگۆ كرا لە بارەی ماف و شایستە داراییەکانی هەرێمی کوردستان لەسەر بنەمای دەستوور و یاسا و دواین داتاکانی سەرژمێری گشتی دانیشتووان، بڕیاردرا لەچەند ڕۆژی داهاتوودا کۆبوونەوەی تایبەت لەگەڵ سەرجەم وەزارەت و دامەزراوەکان ئەنجام بدرێت تاكو بتوانرێت خواستەکانی هەرێمی کوردستان بۆ ساڵی داهاتوو لەبودجەی عێراق جێی بکرێتەوە."
هێمای بۆ ئه‌وه‌ش كردوه "ماوەی چەند مانگێکە وەزارەتی دارایی و ئابووری هەرێمی کوردستان دەستی بە ئامادەکارییەکان کردووە بەمەبەستی خەمڵاندنی بوودجەی پێویست بۆ مووچە و خەرجی بەکارخستن و وەبەرهێنان لەگەڵ داواکردنی دامەزراندنی میلاکی پێویست بۆ هەرێمی کوردستان لە چوارچێوەی یاسای بوودجەی عێراقی فیدراڵ و گەڕانەوەی شایستەی فەرمانبەران و مووچەخۆرانی هەرێمی کوردستان کە بەهۆی نەبوونی بوودجە و قەیرانی داراییەوە بۆیان خەرج نەکراوه."