وەزیری دەرەوەی ویلایەتە یەکگرتووەکانی ئەمریکا ڕایگەیاند، گفتوگۆ و دانوستان لەنێوان ئێران و عوماندا بەردەوامە و ئێمەش تێیدا بەشدارین، سەبارەت بەوەی چۆن لە کورتخایەندا کەشتیی زیاتر بتوانن بە سەلامەتی لە گەرووی هورمزەوە تێپەڕن.
ئاوێنە: مارکۆ ڕووبیۆ ئەمڕۆ سێشەممە لە ڕێوڕەسمی واژۆکردنی یاداشتنامەیەکی لێکتێگەیشتنی ئەتۆمی لەگەڵ پاراگوای وتی "کەشتییەکان لە تێپەڕبووندان. هەر ئێستا نەوت لە گەرووەکەوە دەگوازرێتەوە و گەرووەکان کراوەن".
ناوبراو وتیشی "داماڵینی ئێران لە چەکی ئەتۆمی، ڕێککەوتنی کۆتایی و سەرەکییە، بەڵام ڕێککەوتنی دەستبەجێ کە ئێستا سەرنجی زۆری لەسەرە، پەیوەندی بە گەرووەکەوە هەیە".
هەروەها رۆبیۆ ڕوونیکردەوە "پێشکەوتنی زیاتر لەم دانوستانانەدا بەدی هاتووە، بەڵام هێشتا نەگەیشتووینەتە ئەنجامی کۆتایی، و هیوا دەخوازم ئەوە بەم زوانە ڕووبدات".
چەند کاتژمێرێک پێش ئەم لێدوانانە، سکۆت بێسێنت، وەزیری خەزێنەی ئەمریکا ڕایگەیاندبوو کە ئەگەری هەیە ویلایەتە یەکگرتووەکان تا ڕۆژی چوارشەممە لەگەڵ ئێران بگاتە ڕێککەوتن بۆ کردنەوەی گەرووی هورمز؛ ڕێککەوتنێک کە بە وتەی ئەو دەبێتە هۆی جێگیربوونی نرخی وزە.