وتەبێژی وەزارەتی دەرەوەی ئێران ڕایگەیاند، دانوستانەکانی نێوان تاران و مەسقەت لەسەر رێڕەوی نوێی گەرووی هورمز بەرەوپێشچوونی باشی بڕیوە، هەروەها گفتوگۆکان لەرووی ئاستی تەکنیکی و سیاسی بە ئەرێنی بەڕێوەدەچن.
ئاوێنە: ئەمڕۆ سێشەممە ئیسماعیل بەقایی، وتەبێژی وەزارەتی دەرەوەی ئێران بە کەناڵی (سەدا و سیما)ی وت "ئەم دانوستانانە وەک گفتوگۆ لەنێوان هەردوو دەوڵەتی هاوسنووری گەرووی هورمز پێش دەکەون، و سەرنج دەخەنە سەر دیاریکردنی ڕێڕەوی چوون و هاتنەوەی ئارام و بۆ کەشتییەکان؛ بە شێوازێک کە هاوشانی پاراستنی مافی سەروەریی هەردوو وڵات، رەچاوی تێبینییە ئەمنییەکانی ئاسایشی نیشتمانیی ئێران و عومان بکات".
بەقایی ئاشکراشیکرد "گفتوگۆکان تاوەکو ئێستا لەسەر هەردوو ئاستی تەکنیکی و سیاسی بە ئەرێنی هەڵدەسەنگێندرێن. هەروەها ئێران لە هەوڵدایە بە هاوکاریی عومان، میکانیزم و ڕێوشوێنی پێویست بۆ بەڕێوەبردنی داهاتووی هاتوچۆی کەشتییەکان لەم دەروازە ستراتیژی و گرنگەدا دابڕێژێت".
گوتەبێژی وەزارەتی دەرەوەی ئێران جەختی لەوەش کردەوە، دەرئەنجامە کۆتاییەکانی ئەم دانوستانە دوولایەنانە دوای کۆبەندی و یەکلاکردنەوەی تەواوەتییان، بە فەرمی بە ڕای گشتی دەگەیەندرێن.