سەرچاوەیەک لە حزبی پارتی ئازادی کوردستان ئاشکرای دەکات، شەوی رابردوو لە هەولێر تەقە لە کوڕە تاقانەکەی حوسێن یەزدان پەنا دەکرێت و بە سەختی بریندار دەکرێت و ئەو کارە تیرۆرستییەی ئەنجامدراوە "ئێمە بە کاری ئێرانی دەبینین".
ئاوێنە: ئەو سەرچاوەیەی حزبی (پاک) کە نەیویست ناوی ئاشکرا بکرێت، تایبەت بە ئاوێنەی راگەیاند "دوێنێ شەو کاتژمێر ٠١:٣٠ی شەو کوڕە تاقانەکەی کاک حسێن یەزدان پەنا بەناوی موکری حسێن یەزدان پەنا کە تەمەنی ٢٧ ساڵە، تەقەی لێکراوە لە شوێنی نیشتەجێبونێک لە ناوەراستی هەولێر و هەوڵی تیرۆرکردنی دراوە و بە سەختی بریندارە و لەژێر چاودێری دکتۆردایە".
سەبارەت بە هۆکاری تەقەکردنەکەش لە کوڕە تاقانەکەی حوسێن یەزدان پەنا، ئەو سەرچاوە دەڵێت "ئێمە دژایەتیمان لەگەڵ هیچ کەسێکدا نییە، تەنیا دوژمنی ئێمە ئێرانە، ئێران لە ماوەکانی رابردوودا دەستی داوەتە تیرۆر و رفاندن؛ هەر مانگی رابردوو پێشمەرگەیەکمان لەناو شاری هەولێر تیرۆرکرا و دوێنێ ئێران بە فەرمی رایگەیاند کە ئەو کارەی ئەنجامداوە".
وتیشی "ئێران راشیگەیاند کە کۆمەڵێک هێزیان ئۆپراسیۆنی لەناو شاری هەولێر و سلێمانی دەستپێکردووە بۆ رفاندن و تیرۆرکردن، تەقەکردنیش لە کوڕە تاقانەکەی کاک حوسێن یەزدان پەنا لەدرێژەی ئەو کارە تیرۆرستیانەی ئێراندایە و وایدەبینین".