شارەزایەکی کەشناسی ڕایدەگەیەنێت، لە ئەمڕۆ چوارشەممەوە کاریگەرییەکانی ئەو شەپۆلە گەرما و شێیەی ناوچەکەی گرتووەتەوە بەرەو کەمبوونەوە دەچێت و پێشبینیش دەکرێت لە سەرەتای هەفتەی ئایندەدا بەهۆی هاتنی هەوای فێنکی دەریای ناوەڕاستەوە، پلەکانی گەرما زیاتر دابەزین بەخۆیانەوە ببینن.
ئاوێنە: ئاراس جەبار، شارەزای کەشناسی لە بڵاوکراوەیەکدا ئاماژەی بەوەکردووە، بەهۆی لاوازبوونی ئەو بەرزەپاڵەپەستۆیەی ماوەیەکی زۆرە لە بەرگەهەوای ناوچەکەدا جێگیربووە و وەک سەقفێکی داخراو ڕێگری لە دەرچوونی وزەی گەرمی دەکرد، لە ئەمڕۆ چوارشەممەوە (٥ی ئاب) پەنگخواردنەوەی گەرما و شێ کەم دەبێتەوە. هەروەها لە سەرەتای هەفتەی ئایندەوە بۆ ناوەڕاستی هەفتەکە، بەهۆی کاریگەریی هەوای فێنکی دەریای ناوەڕاستەوە پلەکانی گەرما زیاتر دادەبەزن.
ئەو شارەزایەی کەشناسی پێشبینی دەکات، لە نێوان 11 بۆ 13ی ئەم مانگەدا کەشی ناوچەکە کەمێک گەرم ببێتەوە، بەڵام گەرماکە زۆر بەتین نابێت و ماوەکەشی کورت دەبێت. هاوکات ڕوونیشیکردووەتەوە، ئەگەرێکی دوور هەیە لە 14 تا 19ی مانگ، بارستە هەوایەکی فێنکی فراوان لە دەریای ناوەڕاستەوە ڕوو لە هەرێمی کوردستان و وڵاتانی ناوچەکە بکات، کە دەبێتە هۆی زیاتر دابەزینی پلەکانی گەرما و دروستبوونی ئەگەری بارانبارین لە هەندێک ناوچەی جیاجیادا.