بەپێی زانیارییەکانی دوو سەرچاوەی ناوچەیی و بەرپرسێکی ئەمریکی، ویلایەتە یەکگرتووەکانی ئەمریکا، ئێران و سەلتەنەتی عومان نزیکبوونتەوە لە گەیشتن بە ڕێککەوتنێکی کاتی بۆ دووبارە کردنەوەی گەرووی هورمز، و چاوەڕوانیش دەکرێت لەلایەن واشنتۆنەوە بە شێوەیەکی فەرمی ئەو ڕێککەوتنە ڕابگەیەنرێت.
ماڵپەڕی «ئاکسیۆس» لە زاری ئەو سەرچاوانەوە بڵاوی کردووەتەوە، ئەو ڕێککەوتنەی چاوەڕوان دەکرێت واژۆ بکرێت، بەشێک لە خواستەکانی ئێران بۆ گێڕانی ڕۆڵێکی فراوانتر لە بەڕێوەبردن و کۆنترۆڵکردنی هاتوچۆی دەریایی لە گەرووی هورمزدا دابین دەکات؛ ڕۆڵێک کە تاران پێش هەڵگیرسانی شەڕەکە لەبەردەستیدا نەبوو.
بە وتەی هەردوو سەرچاوە ناوچەییەکە، ئەو ڕێککەوتنەی ئێستا لە قۆناغی تاوتوێکردندایە، کۆمەڵێک ڕێکاری کاتی لە نێوان سەلتەنەتی عومان و ئێراندا بۆ ماوەی ٦٠ ڕۆژ لەخۆدەگرێت، هاوکات هەردوولا مافی ئەوەیان هەیە کە دواتر ئەو ماوەیە درێژ بکەنەوە.
بەگوێرەی ئەو میکانیزمانەی کە هێشتا لە نێوان عومان و ئێراندا لە قۆناغی گفتوگۆدان، جووڵەی دەریایی بە جۆرێک ڕێکدەخرێتەوە کە ئەو کەشتییانەی دەچنە ناو کەنداوەوە، لە ڕێڕەوی باکوور و لەناو ئاوە هەرێمییەکانی ئێراندا تێدەپەڕن؛ لە بەرامبەردا، ئەو کەشتییانەی لە کەنداوەوە بەرەو دەریای عەرەب دەردەچن، لە ڕێڕەوی باشوور و لەناو ئاوەکانی عوماندا، بە هەماهەنگی لەگەڵ ئێران جووڵە دەکەن.
هەر لە چوارچێوەی ڕێککەوتنەکەدا، لە ماوەی ئەو ٦٠ ڕۆژەدا هیچ جۆرە باج و تێچوویەک لە کەشتییەکان وەرناگیرێت. لەلایەکی دیکەشەوە بڕیارە لە ماوەی ٣٠ ڕۆژدا سەرجەم مینە دەریاییەکانی ڕێڕەوی ناوەڕاستی گەرووەکە پاکبکرێنەوە، بۆ ئەوەی دوای ئەو ماوەیە کەشتییەکان بتوانن لە هەردوو ئاراستەکەوە بە سەلامەتی و بەبێ کۆسپ هاتووچۆ بکەن.