دڵشاد شه‌هاب، وته‌بێژی سه‌رۆكی هه‌رێم، ئاشكرایكرد، ئێواره‌ی ئه‌مڕۆ چوارشه‌ممه، نێچیرڤان بارزانی، سه‌رۆكی هه‌رێم بۆ به‌شداریكردن له كۆبونه‌وه‌ی هاوپه‌یمانی ئیداره‌ی ده‌وڵه‌ت ده‌چێته به‌غدا.
ئاوێنه: دڵشاد شەهاب، وتەبێژی سەرۆكایەتی هه‌رێم، له راگه‌یه‌ندراوێكدا وتی، ئێوارەی ئەمڕۆ چوارشەممە ٢٠٢٦/٨/٥ نێچیرڤان بارزانی، سەرۆكی هەرێمی كوردستان، بە مەبەستی بەشداریكردن لە كۆبوونەوەی هاوپەیمانی ئیداره‌ی دەوڵەت، سەردانی بەغدا دەكات.
وتەبێژی سەرۆكایەتی هه‌رێم وتیشی، لە كۆبونەوەكەدا كە هەر چوار سەرۆكایەتییەکەی عێراقی فیدراڵ، سەرۆكی هەرێمی كوردستان و لایەنە پێكهێنەرەكانی حكومەتی فیدراڵی تیایدا بەشدار دەبن، چەندین پرسی پەیوەست بە دۆخی ئێستای عێراق، دوایین پێشهاتەكانی ناوچەكە بەگشتی و چۆنیەتیی هەماهەنگی و هاریكاریی نێوان هەمو لایەنەكان بۆ پاراستنی بەرژەوەندییەكانی عێراق و دەربازبون لەم قۆناغە هەستیارە و تێپەڕاندنی ئاستەنگەکان و خزمەتكردنی هاوڵاتییان، تاوتوێ دەكرێن.
دڵشاد شه‌هاب ئاشكراشیكرد، لە چوارچێوەی سەردانەكەیدا بۆ بەغدا، نێچیرڤان بارزانی دیدار و كۆبونەوەی دیکە ئەنجام دەدات و پرسی پەیوەندییەکانی هەولێر ـ بەغداو کارکردنی هاوبەش بە ئاراستەی هەماهەنگی و هاریکاریی زیاتری نێوانیان، تاوتوێ دەکات.