کۆمپانیای شاماران پێترۆلیۆم لە نوێترین راپۆرتی دارایی و بەرهەمهێنانی خۆیدا کە لە 5ی ئابی 2026دا بڵاویکردووەتەوە، ئاشکرای کرد کە ئاستی بەرهەمهێنانی نەوت لە كێڵگەكانی ئەتروش و سەرسەنگ لە چارەکی دووەمی ئەمساڵدا ڕووبەڕووی پاشەکشەیەکی گەورە بووەتەوە.

ئاوێنە: بەپێی راپۆرتەکە، کارەکانی بەرهەمهێنان تاوەکو 30ی حوزەیران بەهۆی ئاڵۆزییە ئەمنییەکان و بەردەوامی لێکەوتەکانی شەڕی ئێرانەوە زیانێکی زۆری پێگەیشتووە، بە جۆرێک تێکڕای دەرهێنانی ڕۆژانەی نەوت بۆ 1,900 بەرمیل دابەزیوە.

ئەم دابەزینە بەرفراوانە دوای ئەوە هات کە لە سەرەتای ئاداری 2026ەوە تاوەکو کۆتایی حوزەیرانی 2026 بڕیاری راگرتنی خۆپارێزانەی کارەکان لە هەردوو بلۆکی ئەتروش و سەرسەنگ درا. ئەم هەنگاوە ئاستی بەرهەمهێنانی لە چارەکەکانی یەکەم و دووەمی ئەمساڵدا بە شێوەیەکی بەرفراوان کەمکردەوە.

لەسەر ئاستی بەراوردکاری، بەرهەمهێنانی ڕۆژانەی چارەکی دووەمی ئەمساڵ بە ڕێژەی 94.7% دابەزیوە بەراورد بە چارەکی یەکەمی 2026 کە تێیدا ڕۆژانە 35,900 بەرمیل نەوت بەرهەمدەهات، هەروەها بەرامبەر بە چارەکی دووەمی ساڵی 2025 کە ئاستی بەرهەمهێنان 63,800 بەرمیلی ڕۆژانە بوو، پاشەکشەکە گەیشتووەتە 97.0%.

سەرەڕای کەمبوونەوەی بەرچاو لە بڕی نەوتی بەرهەمهێنراودا، کۆمپانیاکە ئاماژەی بەوە کردووە کە بەشێک لە زیانە داراییەکان قەرەبوو کراونەتەوە. هۆکاری ئەمەش دەگەڕێتەوە بۆ بەرزبوونەوەی بەرچاوی نرخەکانی نەوتی خاو لە بازاڕە نێودەوڵەتییەکاندا، کە تێیدا توانراوە هەر بەرمیلێک نەوتی هەردوو کێڵگەکە بە نرخی سەروو 82 دۆلار بفرۆشرێت.