ڕاوێژکاری سەرۆک وەزیران بۆ کاروباری دارایی، ڕایگەیاند کە بەهۆی جیاوازی نرخی نەوت، کە لەنێوان 5 تا7 دۆلار بۆ هەر بەرمیلێکە، بڕی كورتهێنانى دارایی چاوەڕوانکراوی عێراق بەرز بووەتەوە و ئێستا لەنێوان 70 بۆ 80 تریلیۆن دیناره‌، لە کاتێکدا لە بودجەدا 64 تریلیۆن دینار دیاری کرابوو.

ئاوێنە: مەزهەر محەمەد ساڵح، ڕاوێژکاری سەرۆک وەزیران بۆ کاروباری دارایی، گوتی، هۆکاری سەرەکی ئەم دۆخە بریتییە لە دابەزینی نرخی نەوت بۆ ژێر 60 دۆلار بۆ هەر بەرمیلێك، کە ئەو نرخەیە لە بودجەی گشتی وەرگیراوە، هەروەها کەمبوونەوەی بڕی نەوتی هەناردەکراو لە ساڵی 2026 ـدا.

بەپێی وتەکانی ئه‌و ڕاوێژكاره‌، حکوومەت ناچار بووە زیاتر لە 1800 پڕۆژەی ڕاگیراو دووبارە پلانیان بۆ دابنێت، بە شێوەیەک کە پڕۆژە گرنگەکانی بوارەکانی ئاو، تەندروستی و پەروەردە پێشخات و پڕۆژە ناپێویستەکان بۆ کاتی دابینبوونی پارە دوا بخات.

هەروەها ئاماژەی بەوە کرد کە هەناردەی نەوت لە شەش مانگی ڕابردوودا بە شێوەیەکی بەرچاو دابەزیوە، ئەمەش کاریگەری ڕاستەوخۆی هەبووە لە دروستبوونى ئه‌و قه‌یرانه‌ داراییه‌.

لە بارەی چارەسەری ئەو دۆخە، گوتیشی: "حکوومەت سیاسەتی کەمکردنەوەی خەرجی، بەکارهێنانی سیستەمی ئەلیکترۆنی و باشترکردنی بەڕێوەبردنی دارایی گشتی گرتووەتەبەر.