​لە گۆڕەپانی سیاسیی تورکیادا، مەسافات دەروێش ئۆغڵو، سەرۆکی حزبی باش (İYİ Parti)، هەڵوێستێکی توندی بەرانبەر بە پرۆژەیاسای "بەهێزکردنی تەبایی و تێکەڵبوونی کۆمەڵایەتی" نواند، کە ئامانج لێی گەڕاندنەوە و تێکەڵکردنەوەی ئەندامانی پارتی کرێکارانی کوردستان (پەکەکە)یە بە ناو کۆمەڵگەی تورکیا.

ئاوێنە: ​لە کۆبوونەوەی هەفتانەی فراکسیۆنی حزبەکەی لە پەرلەمانی تورکیا، دەروێش ئۆغڵو پرۆژەیاساکەی خستە ژێر پرسیارەوە و ناوی نا "بەڵگەنامەی خیانەت"، بەو پێیەی حزبەکەی لە ژێر هیچ بارودۆخێکدا ئامادە نییە دان بەو هەنگاوەدا بنێت یان قەبوڵی بکات.

​سەرۆکی حزبی باش لە درێژەی وتەکانیدا هێمای بۆ ئەوە کرد کە ناوەرۆکی ئەم یاسایە دەرگا بە ڕووی دروستبوونی "کۆماری دووەم" لە تورکیا دەكاتەوە، و بە شێوازێک دەبینرێت کە هەوڵێکە بۆ هەڵوەشاندنەوەی پێکهاتەی ئێستای دەوڵەت و دامەزراندنەوەی قەوارەیەکی نوێ. ناوبراو پەیمانیدا کە لە سەرجەم ئەو پرۆژانە بوەستێتەوە کە بە وتەی خۆی دەسەڵات لە ڕێگەی بانگەشەی سیاسیی و پێداویستییەوە بۆ بەرژەوەندی خۆی بەکاریان دەهێنێت.

​هەڵوێستی ئۆغڵو تەنها سنووردار نەبوو بە هۆڵی پەرلەمان، بەڵکو لە دەرەوەی پەرلەمانیش ڕەنگدانەوەی هەبوو؛ ناوبراو هۆشداریی ئەوەیدا کە تێپەڕاندنی یاساکە بە دەنگ و زۆرینەی پەرلەمانیی، بە هیچ شێوەیەک مۆری ڕەوایەتیی پێ نادات، و جەختికردەوە کە مێژوو و کۆمەڵگەی تورکیا سزای یاسایی و مێژوویی ئەو لایەنانە دەدەن کە دەستپێشخەری بۆ ئەم کارە دەکەن.

​لە کۆتایی وتەکانیدا، مەسافات دەروێش ئۆغڵو دووپاتیکردەوە: "ئێمە بە هیچ شێوەیەک ئامادە نین ئەو بەڵگەنامە خیانەتکارە قبوڵ بکەین کە ناوی لێنراوە یاسای چوارچێوە، و نابینە بەشێک لەو سیناریۆ و چەواشەکارییەی کە لە ژێر ناونیشانی چارەسەردا دەخرێتەڕوو. سەرجەم ڕێوشوێنە یاساییەکان دەگرینەبەر بۆ لێپرسینەوە لەگەڵ هەر لایەنێک کە هەوڵی دەرکردن و جێبەجێکردنی ئەم یاسایە بدات، چ لە ناو پەرلەمان و چ لە دەرەوەیدا."